Vanity fair viðtal

Nýlega rakst ég á þennan spurningalista sem grínistinn Louis CK var beðinn um að fylla út. Af hverju hann? Er hann merkilegri en ég?

Svar: Já. En ég ætla samt að svara listanum líka. Aðallega þó vegna þess að ég er veikur, enn eina ferðina og hef ekkert að skrifa um.

Hver er þín hugmynd að fullkominni hamingju?
Að lesa frétt um að tölvan sem geymir upplýsingarnar um stúdentalán mín hafi dottið niður stiga og hálsbrotnað.

Hvað er þinn mesti ótti?
Að missa einhvern nákominn og að bíllinn minn bili.

Hvaða lifandi manneskju dáirðu mest?
Enga sérstaka. Ef ég yrði að velja myndi ég segja Barbapabbi og Barbamamma. Að vera foreldrar svona margra krakka án þess að missa vitið er örugglega erfitt.

Hvaða eiginleika þinn fyrirlíturðu mest?
Ég naga neglur. En þó bara mínar neglur. Ennþá.

Hvað finnst þér ofmetnastasta dyggðin?
Ákveðni. Af því ég er það ekki.

Hvað líkar þér verst við útlit þitt?
Gleraugun mín. Og sokkarnir sem ég er í passa illa við leðursamfestinginn sem ég er í.

Hvað eða hver er ást lífs þíns?
Microsoft Excel 2010.

Hvenær og hvar varstu hamingjusamastur?
Ég man ekki hvenær það var en ég lá örugglega í grasi.

Hvaða hæfileika værirðu mest til í að búa yfir?
Óraunhæfur: Að þurfa ekki að sofa. En geta það samt.
Raunhæfur: Að vera mjög góður í að drekka kaffi. Í dag kann ég það ekki.

Í hvernig skapi ertu?
Ég er yfirleitt í sama skapinu. Sem er nokkuð gott skap.

Ef þú gætir breytt einhverju einu við þig, hvað yrði það?
Meiri metnað í fatavali.

Ef þú gætir breytt einu við fjölskyldu þína, hvað yrði það?
Að hún byggi nær mér.

Hvað telurðu vera þitt mesta afrek?
Fyrir utan að hafa verið í öðru sæti í bringusundi í mínum riðli á fámennu sundmóti í Bjarnarfirði 1989? Sennilega að ég gaf út bók fyrir nokkrum árum.

Ef þú gætir valið hvað þú kæmir aftur sem, hvað yrði fyrir valinu?
Hundur. Þeir eru yfirleitt frekar hressir.

Hvað telurðu vera þína lægstu stund eymdar?
Þegar ég vaknaði nær dauða en lífi eftir áfengisdauða á miðjum Vilhjálmsvelli á Egilsstöðum eftir, að ég held, dansiball.

Hvaða eiginleika líkar þér best við í karlmönnum?
Hlédrægni.

Hvaða eiginleika líkar þér best við í konum?
Hlédrægni.

Hvað kanntu mest að meta í fari vina þinna?
Liðleiki (í samskiptum!).

Hverjir eru þínir uppáhalds rithöfundar?
Ég á mér enga.

Hver er þín uppáhalds hetja í skáldsögum?
Dexter Morgan.

Hverjar eru hetjur þínar í raunveruleikanum?
He-Man auðvitað.

Hvað mislíkar þér mest?
Tillitsleysi og tilætlunarsemi. Og hundaskítur.

Hvernig myndirðu vilja deyja?
Hver segir að mig langi að deyja? Ok fínt. Í svefni, takk.

Hvert er slagorð/mottó þitt?
„Nei, takk.“

Kvikmyndir ársins 2012

Hér er topp 8 listi minn yfir þær kvikmyndir sem ég sá á nýliðnu ári. Ath. einhverjar þeirra eru mögulega ekki frá árinu 2012. En ég sá þær amk á árinu. Og það er það eina sem skiptir máli.

1. Skyfall (Ísl: Saurbær)
James Bond klikkar ekki með Daniel Craig í hlutverkinu. Hvergi nærri jafn góð og Casino Royal og aðeins betri en Quantum of Solace.
3,5 stjörnur af fjórum.

2. Looper (Ísl: Lárus Lykkjari fer á kostum)
Vísindaskáldsaga með Joseph Gordon-Levitt í hlutverki Bruce Willis í hlutverki leigumorðingja í framtíðinni og lengra í framtíðinni (Lalli Lykkjari), sem keppist við að drepa sjálfan sig áður en hann drepur sjálfan sig.
3,5 stjörnur af fjórum.

3. Dredd (Ísl: Dómari Davíð)
Ein óvæntasta mynd ársins. Og það í 3D sem ég hata meira en fólk sem ekki gefur stefnuljós. Davíð dómari læsist inni í risablokk og þarf að taka á honum stóra sínum til að halda sér á lífi. Sérstaklega skemmtilegt túlkun á Davíð Dómara, sem bókstaflega skelfur úr hatri.
3,5 stjörnur af fjórum.

4. The Dark Knight Rises (Ísl: Maður klæddur sem leðurblaka rís)
Þriðja og síðasta myndin um manninn sem er klæddur eins og leðurblaka. Ein af verstu myndum leikstjórans, sem segir ekkert þar sem hann gerir bara góðar myndir.
3,5 stjörnur af fjórum.

5. The Girl with the Dragon Tattoo (Ísl.: Barnaby ræður gátuna)
Hollywood útgáfan. Svipað góð og upphaflega útgáfan. Talsvert dekkri. Fjallar um karlmenn sem hata konur og Lisbeth Salander.
3,5 stjörnur af fjórum.

6. 21 jump street (Ísl.: Bankastræti 21)
Ólíklegt lögguvinapar fer í gervi menntaskólanema til að leita að dópi eða einhverju. Mun fyndnari mynd en ég bjóst við.
Þrjár stjörnur af fjórum.

7. Chronicle (Ísl.: Sér grefur gröf).
Unglingar fá ofurhæfileikann til að færa hluti úr stað með hugarorkunni. Upphefst mikið ævintýri. Áhugaverð og vel leikin mynd
Þrjár stjörnur af fjórum.

8. Contagion (Ísl.: Smit)
Raunsæ mynd um það hvað myndi gerast ef banvænn vírus kemst í umferð. Vel leikin og afar áhugaverð mynd.
Þrjár stjörnur af fjórum.

Heiðurssæti: ∞. Killer Joe (Ísl.: Jói vondi kall)
Eitthvað það allra ömurlegasta sem ég hef látið innfyrir augu mín. Tilgerðarleg, ofleikin og afspyrnu heimskuleg.
Hálf stjarna af fjórum.

Áramótaheiti 2013

Eitt af ca 25 áramótaheitum mínum þetta árið er að skrifa oftar á þessa síðu. Áramótaheiti mitt í fyrra var að strengja áramótaheiti þetta ár um að blogga oftar, svo ég náði að uppfylla það rétt í tæka tíð áður en árinu lauk.

Hér eru sex stærstu áramótaheitin þetta árið:

1. Að koma íbúðinni sem ég bý í í gestvænlegt horf.
Til dæmis að kaupa mér nýtt rúm, setja upp myndir, lýsa stofuna betur upp og jafnvel brjóta saman eins og ein föt saman og setja í skáp, helst fleiri.
Líkur: 95%.

2. Borða hollara.
Reyna að drekka ekki gos með hverri máltíð og borða Risahraun í hvern eftirrétt. Hljómar auðvelt. En er það ekki. Sérstaklega ekki í miðjum nammitremma.
Líkur: 1,3%.

3. Fara á amk eitt fyllerí á árinu.
Í fyrra drakk ég samtals einn bjór. Ég vil gjarnan auka áfengisneysluna um amk 10.000%.
Líkur: 35%.

4. Sofa minna á daginn og meira á nóttunni.
Ég nálgast óðfluga að sofa lengur á daginn við að leggja mig en við nætursvefn fyrir vinnu. Það verður að breytast áður en illa fer.
Líkur: 50%.

5. Skrifa meira.
Ég hef aldrei verið minna virkur í skrifum en á síðasta ári. Ég þarf að snúa þessari þróun við. Jafnvel gera eitthvað nýtt í þeim efnum.
Líkur: 75%.

6. Losa mig við Peugeot draslið mitt áður en hann gerir mig gjaldþrota.
Þetta hef ég sagt í næstum 7 ár.
Líkur: 0,37%

Jólafrí 2012

Ég er kominn aftur til Reykjavíkur (Kópavogs nánar tiltekið) eftir tveggja vikna jólafrísdvöl á Egilsstöðum (í Fellabæ nánar tiltekið), sem útskýrir aðeins að hluta til áður óþekkta leti mína við skrif á þessa síðu.

Í jólafríinu tók ég upp á allskonar nýungum, sem hingað til hefði ég aldrei látið mér detta í hug að gera, eins og:

• Að horfa á Mamma Mia, dansandi og syngjandi með.
• Að dansa um í fáránlegri samsetningu fata með hárspennu í hárinu, án nokkurrar tónlistar.
• Flýja undan risaeðlum, krókódílum og Mikka Ref sem ætluðu að kítla mig.
• Láta inniskónna mína tala, eins og þeir væru kettir.
• Syngja hástöfum allskonar lög, án undirspils og í kringum allskonar fólk, án þess að skammast mín fyrir afskaplega takmarkaða sönghæfileika.

Hver er ástæðan? Hér eru nokkrir möguleikar:

1. Ég hef hafið eiturlyfjaneyslu og það gengur nokkuð vel.
2. Ég missti vitið á því að vera bílveikur á leiðinni austur.
3. Ég var að uppfylla áramótaheiti frá árinu áður.
4. Ég er orðinn það ríkur að mér er sama um álit annarra og geri það sem ég vil, þegar ég vil.
5. Ég var að leika við Valeríu Dögg, rúmlega 2ja ára bróðurdóttir mína.

Rétt svar: 5. Og smá 1.

Lykillinn að hamingju

Ég var að sjá að einhver Googlaði "Lykillinn að hamingju" og komst á þessa síðu.

Aldrei nokkurntíman hefur neinn verið á jafn röngum stað á internetinu og þessi aðili.

Ég vona að hann hafi ekki tekið neitt alvarlega sem er skrifað á þessa síðu. Og ef hann gerði það, að hann hafi ekki farið sér að voða.

Danskir brjóstdropar

Mér finnst alltaf jafn ótrúlegt til þess að hugsa að enn sé ekki til almennileg og fljótvirk lækning við kvefi eða flensu. Það er þó ekkert miðað við undrun mína þegar örvænting greip um sig í gærkvöldi og ég keypti, og drakk, danska brjóstdropa í fyrsta sinn.

Hvernig í ósköpunum tókst vísindamönnunum sem gerðu þetta að búa til svona vont bragð? Ef ég ætti að lýsa því myndi ég segja að þeir bragðist eins og illska og möglega lakkrís með keim af samviskubiti í eftirbragð.

Nú þarf ég bara að skoða hvort það sé betra að blanda þá í kók eða í appelsínusafa og ég mun ná heilsu aftur, eða amk hætta að hósta í hvert sinn sem ég tala upphátt (ca þrisvar á dag).

Viðbót: Var að komast að því að það minnkar eftirbragðið talsvert að rífa nögl af fingri annarar handar, þó ekki nema í nokkrar sekúndur á meðan öskrað er úr sársauka. Vel þess virði.

Flensutölfræði

Í dag er runninn upp flensudagur minn númer tólf. Á þeim tíma hef ég misst af eða tapað:

• Fimm körfuboltaæfingum.
• Sex ræktarferðum.
• Fjórum bíóferðum.
• Tveimur matarboðum.
• Þremur fullum vinnudögum.
• Fimm vinnudögum á fullum afköstum.
• Fjórtán rúllum af snýtipappír.

Og nú þessum sunnudegi, þar sem ég var að vakna um klukkan 18 eftir að hafa hóstað alla nóttina.

En ég hef líka grætt á þessari flensu:

• Tvö kíló af fitu.
• 75 kg af andlegri fitu.
• Hálfan tank af bensíni sem annars hefði verið notaður í að gera eitthvað.

Svo ég kem út á sléttu eftir þessa flensu, þeas ef hún endar einhverntíman.

10 ára afmæli

Nýjustu fréttir

1. Nýtt barn í ættinni
Nýlega fæddi Kolla systir sér og manni sínum son, þremur vikum fyrir tímann. Móður og barni heilsast vel. Þetta stækkar ættina umtalsvert og eiga nú foreldrar mínir sex barnabörn. Ekki amalegt.

Uppfært ættartré:

2. Veikindi
Fyrir um mánuði fékk ég einhverskonar flensu. Þegar henni lauk tók líkaminn minn upp á því að fá aðra flensu, sem ég er staddur í núna. Ég á bara eftir að snýta úr mér bláum lit til að vera kominn með allt litrófið. Ég geri ráð fyrir að þá láti hún sig hverfa.

3. Minnst spennandi
Ég er ekki sá eini í minni fjölskyldu sem er veikur. Bíllinn minn greindist nýlega með ónýtan rafgeymi. Það olli því að ég lét út úr mér minnst spennandi setningu allra tíma við vinkonu mína: „Ég ætla að skjótast í Hafnarfjörð að skoða rafgeyma“, sem ég gerði og greiddi litlar 20.000 krónur fyrir. Í dag er Peugeot-inn minn einn besti bíll landsins.

4. Tíu ára afmæli
Þetta blogg átti víst tíu ára afmæli í byrjun október. Þegar ég hóf skrif á þessari síðu vann ég annað hvort á Skattstofu Austurlands eða á Heilsugæslunni á Egilsstöðum, var einhleypur og barnlaus og átti bíl sem var drasl.

Núna vinn ég hjá 365, er einhleypur og barnlaus og á bíl sem er drasl. Annað hefur ekki breyst.

Þar með lýkur 10 ára afmælishátíð síðunnar.

Barnajól

Í jólablaði Fréttablaðsins i dag eru nokkrir aðilar spurðir nokkurra spurninga. Að sjálfsögðu var litið framhjá mér þegar kom að þessum spurningum! Ég læt ekki vaða svona yfir mig og svara því spurningunum hér.

Barnajól

Hvers vegna höldum við jól?
Til að taka smá pásu frá hversdagslega lífinu og til að fagna hækkandi sól.

Hvað langar þig mest í jólagjöf?
Að sofa út í 10 daga í röð.

Hvað eru jólasveinarnir margir?
Einn og átta. Og fjórir.

Hver er uppáhaldsjólasveinninn þinn?
Stúfur.

Hvað myndirðu vilja borða á jólunum?
Hvað sem er. Nema rækjur.

Hvernig lítur jólakötturinn út?
Ekki ósvipaður Jóni Stóra, handrukkara.

And-áhugamál

Í dag hóf ég leit að nýju áhugamáli þegar ég, í stað þess að leggja mig eftir vinnu, henti í þvottavél, fór í sturtu, rakaði mig og þreif húsið.

Í stað þess að finna eitthvað sem ég gat hugsað mér að gera af áfergju reglulega, fann ég mér and-áhugamál. Það felur í sér að þrífa rimlagluggatjöld. Ekkert í þessu lífi er leiðinlegra að gera.

Ég stefni á að gera það sem allra sjaldnast og af mjög litlum áhuga. Ég vil gjarnan að það standi "Hann komst í gegnum lífið án þess að þrífa rimlagluggatjöld mjög oft" á legsteininum mínum.

Eftir þennan fund lagði ég mig.

Ævintýraleg bíóferð

Fyrir tæpri viku fór ég að sjá nýjustu James Bond myndina, Skyfall með vini mínum Eysteini Ara.

Myndin fjallar um ærslabelginn James Bond og ævintýri hans. Mjög góð mynd eins og allar James Bond myndirnar með Daniel Craig í aðalhlutverki. Það er mín kenning að hvaða James Bond mynd Daniel Craig sem er (Casino Royale, Quantum of Solace eða Skyfall) er betri en allar hinar James Bond myndirnar samanlagt, jafnvel margfeldi þeirra.

En meira um bíóferðina sjálfa. Það má eiginlega segja að ég hafi verið í hlutverki James Bond þetta kvöld. Fyrst þegar myndin hvarf af skjánum þegar um hálftími var eftir af henni en hljóðið hélt áfram, vegna einhverra mistaka starfsfólks. Rétt eins og njósnari hélt ég ró minni allan tímann. Njósnari missir ekki tök á skapi sínu og öskrar eitthvað óskiljanlegt í átt að sýningarvélinni, eins og næstum allir aðrir í salnum.

Ekki nóg með það heldur læstust nokkrir gestir myndarinnar inni í hringhurð á leið úr Smáralindinni (þar sem myndin var sýnd) þegar náunginn á sýningarvélinni þurfti líklega að leysa af á stjórntækjum hringhurðarinnar. Ég bauðst til að leita að starfsmanni öryggisgæslunnar, en án árangurs.

Í miðju símtali við 118 sá ég öryggisvörð á næstu hæð fyrir ofan, starandi á mig:

Ég: *Bendi á hann og gef til kynna að hann þyrfti að koma*
*Öryggisvörður horfir svipbrigðalaus á mig*
Ég: *Bendi af meiri ákafa, um leið og ég kveð 118, þar sem ég hafði fundið öryggisvörð*
*Öryggisvörðurinn horfir enn svipbrigðalausar á mig*
Ég: Ertu að vinna hérna?
Öryggisvörður: *Grafalvarlegur* Lít ég ekki út fyrir það?
Ég: Komdu þá! Það er fólk búið að vera læst í hringhurðinni hérna í 10 mínútur.
Öryggisvörður: Ó..eh...ok.
*Ég geng úr Smáralindinni án þess að líta til baka, eins og James Bond*

Og þetta náði ég að gera án Excel. Ótrúlegt.

Ég gef myndinni þrjár og hálfa stjörnu af fjórum.

Peugeot pirringur

Það hefur ýmislegt komið fyrir bíl minn, Peugeot 206 árgerð 2000, síðan ég keypti hann fyrir sex árum. Flest af því hefur farið í taugarnar á mér. Um helgina gerði hann svo eitthvað sem slær öll met í að vera óþolandi.

Hér er listi yfir fimm mest pirrandi hluti sem hann hefur gert

5. Skildi skó eftir á þakinu.
Eftir körfuboltaæfingu á Álftanesi geymdi ég körfuboltaskónna á þaki bílsins á meðan ég ruslaði mér inn í hann og keyrði af stað. Ég var hálfnaður til Reykjavíkur þegar ég áttaði mig á mistökunum. Sem betur fer elti Gutti körfuboltagarpur mig og hirti upp skónna.

Tæknilega ekki bílnum að kenna. En samt. Helvítis Peugeot.

4. Rafmagnsleysi veldur því að ég komst ekki í rækt.
Bíllinn var rafmagnslaus um daginn þegar ég ætlaði í ræktina. Að vísu hefur þessi rafgeymir enst mun lengur en líftími rafgeyma er alla jafna. En samt.

3. Lásinn á bílstjórahurðinni datt af og önnur afturhurðin hætti að opnast.
Sirka ári eftir að bakkað var á mig og gert var við beygluna hætti önnur áklesst hurðin að opnast og lás hinnar datt af. Ég hef ekki læst bílnum mínum núna í um þrjú ár.

2. Eitthvað í vélinni hrundi.
Eitthvað rándýrt hrundi í vélinni (sem ég man alls ekki hvað kallast) tvisvar á sama ári. Ekki bara kostaði viðgerðin um 1000% af mínum fjármunum og tók nokkrar vikur heldur varð ég að taka strætó í mánuð það árið, til að komast ferða minna. Hryllingurinn.

1. Rúðuþurrkur skakkar.
Um helgina tók bíllinn upp á því að stoppa alltaf rúðuþurrkurnar í ca 30° hæð (í stað 0° venjulega). Ekkert gæti mögulega farið meira í taugarnar á mér. Ég togaði þær í 0° en en alltaf þegar ég set þær af stað aftur stoppa þær í sömu 30°. Helvítis Peugeot.