Ég er búinn að fá nóg af fólki sem hlær að mér fyrir að halda hinu rétta fram; nágrannar er raunveruleikasjónvarp. Hér eru nokkrar spurningar fyrir ykkur sem halda því fram að þetta sé allt "gert eftir handritum", leikið og leikstýrt:

* Hvernig í ósköpunum áttu leikstjórarnir og höfundarnir að láta Madge hans Harold fá krabbamein og deyja? Þeir eru kannski leikstjórar en ekki guðir!

* Ef þetta er allt samið og leikstýrt; af hverju er þá ekki búið að góma þann sem kveikti í Lou's Place og kaffistofu Harold? Þeir sem skrifuðu þetta hljóta að vita hver gerði þetta og því væri hægt að handtaka helvítið strax.

* Nýlega kom í ljós að Gus nokkur var myrtur og brenndur. Hvaða leikari haldið þið að samþykki að láta drepa sig og brenna? Enginn!

Ég hef sagt það áður og ég segi það aftur; Nágrannar er bein útsending frá Ástralíu. Það er ekkert samsæri í gangi, engir leikstjórar og enginn leikari. Hættið þessu tuði.

Vegna fjölda áskoranna birti ég hér með vöðvann sem þarf að skera upp á mér til að losa taug undan ógnarvaldi vöðvans, svo ég fái aftur tilfinningu í rist og táslur hægri fótar:

Vöðvinn heitir Extensor Digitorum Longus.

Ykkur skal finnast þetta áhugavert af því mér finnst þetta áhugavert!

Ég virðist algjörlega hættur að geta talað við fólk í persónu sem ég hitti alla jafna ekki oft. Hver einasta bráðfyndna skemmtisaga mín er trufluð með orðunum "Ég veit. Las það á síðunni þinni."

Ég mun því ekki segja frá því hér að ekkert er að frétta af mér þessa dagana. Bara svo ég geti haft eitthvað að segja í næsta samtali.

Alltaf þegar ég panta miða á tónleika með snilldarbandinu White Stripes verð ég mjög spenntur.

Alltaf þegar ég verð mjög spenntur smellur eitthvað í hausnum á mér.

Alltaf þegar eitthvað smellur í hausnum á mér þá fæ ég óminni (blackout).

Alltaf þegar ég ranka við mér er ég nakinn á opinberum stöðum.

Alltaf þegar ég nakinn á opinberum stöðum verð ég að blogga.

Og það vill svo skemmtilega til að ég var að kaupa miða á tónleika White stripes í Laugardalshöllinni þann 20. nóvember næstkomandi með ótrúlegum afleiðingum.

NBA tímabilið er hafið enn eina ferðina. Eins og myndin hér að ofan gefur til kynna er risinn Greg Ostertag kominn aftur til Utah Jazz (mitt lið) eftir eins árs fjarveru.

Allavega; Utah Jazz unnu í nótt og standa þá leikar þannig:
Unnir leikir: 1
Tapaðir leikir: 0

Ef Jazz halda áfram á þessari braut munu þeir sigra 82 leiki á tímabilinu og tapa engum, sem yrði nýtt met í NBA deildinni. Ég er vægast sagt orðinn spenntur fyrir tímabilinu.

Í morgun mætti ég korteri of snemma í skólann til að forðast mikla morgunumferð. Þegar ég var búinn að finna fínt stæði við HR fattaði ég að ég hafði gleymt öllu mínu skóladrasli heima. Ég mætti því 20 mínútum of seint í skólann í morgun.

En ég sé ekki eftir neinu. Morgunumferð Reykjavíkur er frábær!

Það er komið að stórri stund í sögu þessarar síðu. Í fyrsta sinn ætla ég að segja algjöran sannleik. Ég vara þó viðkvæma nöldurseggi við; ég mun vera væminn.

Þessa dagana og vikurnar...

...er skólinn að reyna að drepa mig úr verkefnavinnu. Ég á enga frístund og hef engan veginn undan í vinnslu á umræddum verkefnum.
...hef ég hef sjaldan spilað jafn lítinn körfubolta.
...standa peningamál mín óvenju höllum fæti.
...er ég að verða gráhærður af náttúrulegum orsökum.

Allt eru þetta liðir sem alla jafna myndu gera mig geðveikan en ekki í þetta skiptið. Ástæðan er fyrir því að ég helst réttum megin við strikið og reyndar langt hinum megin við strikið, má sjá á mynd hér að neðan:

Hér er venjulega myndin.

Svona sé ég þessa sömu mynd.

Bergvin er mættur aftur á bloggsjónarsviðið eftir áralanga pásu. Hér getið þið lesið allt um líf hans þessa dagana.

Sem minnir mig á það; konur sem hafa mikið estrógen þykja fallegri.

Nú þarf ég hjálp ykkar, lesendur góðir.

Er eitthvað stórkostlegt að mér að hlæja að þessari mynd í korter samfleytt?

Takið þetta.

Stundum hata ég sjálfan mig svo mikið.

Dagskráin hjá mér í skólanum þessa önnina er orðin býsna skrautleg. Föstudaginn 11. nóvember næstkomandi verð ég að vera búinn að skila inn fjórum risaverkefnum sem gilda samtals 137 prósent af heildareinkunn námskeiða (sem eru 5 talsins). Sú hugsun að dreifa þessum verkefnum jafnara yfir önnina er kennurum fjarlæg svo að nú eru góð ráð dýr. Ég hef sett fram eftirfarandi áætlun:

2.-9. nóvember: Læra.
9. nóvember: Æla blóði af stressi. Fá mér smá að borða. Fara í sturtu. Skipta um nærbuxur.
10.-11. nóvember: Læra.

Hljómar eins og skotheld áætlun.

Ég veit ekki af hverju en mér fannst ég þurfa að skrifa þetta.