föstudagur, 31. október 2008

Nýlega opnaði þessi síða, þar sem Íslendingar mótmæla því að einhver Gordon Brown hafi notað hryðjuverkalög á landið. Það er bæði hægt að skrifa nafn sitt á lista og senda inn mynd, sýnandi að við erum ekki hryðjuverkamenn.

Ca 95% af myndunum láta mig hríðskjálfa úr aulahrolli. Ég get samt ekki verið minni maður en sótsvartur almúginn. Ég sendi inn eftirfarandi myndir:




Smellið á myndirnar fyrir stærri eintök.

Módel: Björgvin Gunnarsson (bróðir minn) og Bergvin Jóhann Sveinsson (frændi minn).
Myndataka: Finnur Torfi Gunnarsson (elskhugi minn og ég).
Ár: 2006.
Þá er komið að sparnaðarráðum Finns.

Ég fékk talsvert af kvörunum frá síðustu sparnaðarráðum, m.a. að ef slökkt er á öllum ofnum í húsinu þá frjósi fólk í hel, sérstaklega í 70 gráðu frostinu sem gengið hefur yfir landið. Hér er því lagfæring á ráðinu:

* Slökkvið á öllum ofnum í húsinu.
Þegar kuldinn er alveg að verða óbærilegur, kveikið á laginu hér að neðan og æfið dansinn í myndbandinu. Hann heldur á ykkur hita. Passið bara að springa ekki úr stuði.




* Sparið ykkur nauðungaráskriftargjald RÚV.
Það eina sem þið þurfið að gera er að henda öllum sjónvarpstækjum, útvarpstækjum, nettengdum tölvum og rífa útvarpið úr bílnum og viti menn; maður sleppur við að borga af þessari hrútleiðinlegu stöð.

fimmtudagur, 30. október 2008

Launin hjá starfsmönnum 365 munu lækka eftir mánaðarmótin. Ég vinn þar.

Mötuneytið hjá 365 er glórulaust í verðlagningu. Þannig hækkaði t.d. súkkulaðið Malta úr 70 krónum í 145 krónur einn daginn.

Stýrivextir snarhækkuðu nýlega upp í 18% og voru þó háir fyrir.

Til að taka þetta saman; neysluvörur snarhækka í verði, laun lækka og vextir af lánum (sem maður tekur til að eiga fyrir einhverju) hækka. Góðir tímar.

Ég vil gjarnan hitta manneskjuna sem sagði að peningar kaupi ekki hamingju og stinga hana í augun.

miðvikudagur, 29. október 2008

Upphaflega auglýsingin:



Framhaldið, 8 árum síðar:



Munið svo að kjósa Obama.

mánudagur, 27. október 2008

Getraun dagsins; hver er munurinn á myndunum fyrir neðan?





Svar: Það eru fimm börn og fóstra á efri myndinni.

sunnudagur, 26. október 2008

Eftirfarandi aðgerðir teljast hættulega nördalegar:

* Að tefla.
* Að hanga á internetinu.
* Að vera einn heima á laugardagskvöldi.

Ég sprengdi alla skala í gærkvöldi (laugardagskvöld) þegar ég sameinaði þessi þrjú atriði og tefldi á internetinu til 3:30 um nóttina. Ekki nóg með það heldur vann ég skákina og hló mjög asnalegum hlátri þegar andstæðingurinn gaf.

laugardagur, 25. október 2008

Klukkan 2 í nótt datt mér í hug að framkvæma rannsókn. Hér er skýrslan:

Rannsóknarefni:
Áhrif skúffukökuáts á körfuboltagetu.

Rannsóknaraðferð:
Ég borðaði hálfa skúffuköku kl 2:30 um nótt, 8 tímum fyrir körfuboltaæfingu. Með henni drakk ég 2 glös af léttmjólk. Skömmu síðar fór ég að sofa.

Framkvæmd:
Æfingin byrjaði ágætlega en fljótlega hætti ég að geta andað. Eftir 90 mínútur var ég kominn að því að kasta upp.

Niðurstaða:
Þol minnkar um 60%.
Geta minnkar um 2%.
Blót og öskur yfir slæmu gengi eykst um 450%.
Löngun til að deyja eykst um ∞.

Þannig að ég mæli ekki með því að borða skúffuköku svona skömmu fyrir körfuboltaæfingu.

Næst ætla ég að kanna áhrif Risahraunáts á körfuboltagetu.

fimmtudagur, 23. október 2008

Í gærmorgun vaknaði ég við ófagra sjón. Hvorki fleiri né færri en níu bólur voru mættar í annars frekar ófrítt andlit mitt. Þetta kom mér í opna skjöldu.

Svo fór ég að hugsa; hvernig hefur nammineysla mín verið í október? Og í framhaldinu; hvernig er fylgnin milli andlitsbóla og nammineyslu?

Ég skoðaði eitt af fjölmörgum Excelskjölum sem ég held til haga um neyslu mína, atgervi og hegðanaferli og sá strax munstur.

Smellið á myndina fyrir stærra eintak.



Svo virðist sem neikvæð fylgni sé á milli þess að borða nammi og fá bólur í framan, þeas því meira nammi sem ég borða, því færri bólur eru framan í mér.

Nýlegt heilsuátak mitt í nammiáti er því að fara mjög illa í líkamann, með áður nefndum mótmælum hans.

Hér er því komin enn ein ástæðan fyrir að borða nammi í nánast hvert mál.

miðvikudagur, 22. október 2008

Hrezz


Hrezz
Originally uploaded by finnurtg
Ef einhver spyr, hér eftir, þegar ég mæti í vinnuna á morgnanna hvernig líðanin sé þá ætla ég á að sýna þessa mynd. Svona líður mér alla morgna.

Módelið er Jón Ólason, 4ra mánaða sonur Óla Rúnars gítarsólóleikara með meiru.
Upphaflegur tilgangur þessarar síðu var að skrifa eingöngu færslur um aðsókn á síðuna. Því miður fóru þá hlutir í að gerast í lífi mínu sem ollu því að þannig færslur urðu undir og nánast hurfu.

Til að bæta upp fyrir þetta klúður er hér færsla um aðsóknina á þetta blogg síðustu þrjú og hálft ár.

Fyrst fáum við tvær myndir:

Mynd 1

Mynd 2

Á mynd 1 má sjá að aðsóknin á þessa síðu var upp á sitt best í ágúst 2005, eða um 140 gestir á dag. Þá hófst eitthvað vanskapað hamingjutímabil sem olli því að aðsóknin hrundi niður í 65 gesti á dag í janúar 2006.

Þá tók ég upp á þeirri snilldar stefnu að taka athugasemdir út, sem olli áframhaldandi hruni. Þær voru svo settar aftur inn í október 2006 og því fylgdi lítilsháttar uppsveifla. Í júní 2007 var botninum svo náð þegar síðunni var lokað í nokkrar vikur og stefna síðunnar endurskoðuð.

Eftir það hefur síðan verið á uppleið ef litið er til daglegra gesta. Ef litið er á 12 mánaða meðaltalið má svo sjá stefnu aðsóknarinnar. Hún vísar upp.

Á mynd 2 má svo sjá meðaltal daglegra gesta á mánuði tvö síðustu ár, borið saman við meðaltal daglegra gesta á mánuði það sem af er ári 2008. Það lítur út fyrir að við séum yfir meðaltalinu, sem er gott.

Þetta ætti að róa hluthafa veftímaritsins, sem hafa hringt í mig látlaust síðan bankarnir hrundu. Veftímaritið Við Rætur Hugans stendur sterkt og er á uppleið. Ég hugsa að ég splæsi á mig 200 milljóna snekkju af því tilefni. Stafrænni, auðvitað.

þriðjudagur, 21. október 2008

Í ljósi skugga kreppu get ég illa sofið nema ég opni nýtt horn á þessu bloggi, hið svokallaða Sparnaðarráð Finns hornið. Ég byrja á tveimur sparnaðarráðum:

* Slökkvið á öllum ofnum í húsinu.
Það verður kannski kalt í íbúðinni, sérstaklega í vetur, en með þessu þarf enga klaka út í kókglasið til að halda kókinu köldu. Það fer talsvert af orku í að frysta svona klaka í frystinum.

* Ráð fyrir tattoo elskendur.
Ef þú ætlar að fá þér tattoo á næstunni er hér eitt sparnaðarráð. Fylgið eftirfarandi skrefum:

1. Grenntu þig niður í skinn og bein.
2. Fáðu þér agnarsmátt tattoo og borgaðu mjög lítið fyrir.
3. Fitaðu þig eins og þú mögulega getur.
4. Voilá! Tattooið er orðið risastórt fyrir smápeninga.

Þá er þessum fyrsta þætti af Sparnaðarráðum Finns lokið. Fylgist með spennandi ráðum í framtíðinni, ókeypis, hér á síðunni!

mánudagur, 20. október 2008

Ég hef uppfært listann yfir það sem ég get gert með tölunni 100:

* Keyrt á 100 km hraða.
* Talið upp í 100.
* Hlaupið 100 metra án þess að stoppa.
* Borðað 100 sneiðar af skúffuköku (frá Myllunni) án þess að æla mjög mikið.
* Skrifað 100 atriði um hluti sem ég get gert með tölunni 100.
* *Nýtt* Lyft 100 kílóum í bekkpressu.

Nú er stefnan tekin á 110 kíló. Í þetta sinn án þess að það blæði úr öllum götum líkamans við áreynsluna og með hljóðlátari öskrum.

sunnudagur, 19. október 2008



Út er komin ný ljóðabók. Ekki aðeins er hún vel samin, skemmtileg, fyndin og með flottri kápu heldur er hún líka samin af bróðir mínum, Björgvini Gunnarssyni, einnig þekktur sem Lubbi Klettaskáld. Bókin ber nafnið Kvæðahver.

Þetta er ekki fyrsta bók Björgvins og ekki önnur. Ekki heldur sú tólfta, heldur sú fjórða í röðinni. Hér er útgáfulisti hans:

1998 - Kvæða hver?
2000 - Skrafl (með Þorbirni frá Klöpp)
2003 - Svart á hvítu
2008 - Kvæðahver

Allavega, nýja bókin kostar kr. 2.000 og er hægt að nálgast hjá Björgvini bróðir í netfangið bjg8@hi.is eða í síma 866 2066.

Mæli mjög með þessari bók. Svo mjög að ég er tilbúinn að setja myndband við lagið Det snurrar i min skalle (Ísl.: Það snýst í huga mínum) með Familjen hér fyrir neðan, sem tákn um gríðarlega ákefð meðmæla minna.

laugardagur, 18. október 2008

Aðsóknin á þessa síðu jókst um rúm 8% milli vikna 40 og 41. Ef fer fram sem horfir með þessa viku (nr 42) mun aðsóknin aukast um 5% frá viku 41.

Til að fagna þessum fréttum hef ég ákveðið að verðlauna sjálfan mig með því að deila tónlist með lesendum. Þannig næ ég að troða skoðunum mínum í kokið á öðrum um leið og ég sleppi við frumlega hugsun.



1. Vitalic - Trahison: Angurvært lag sem kemur hressasta fólki í betra skap.
2. Familjen - Det snurrar i min skalle: Flottasta sænska lag sem ég hef heyrt. Abba meðtalin.
3. E.T.A. - Casual Sub: Einkennileg útgáfa af þessu lagi. Samt með flottari lögum síðustu ára.

fimmtudagur, 16. október 2008

Úr albúminu UMFÁ vs Leiknir R

Myndir.

Þetta er stysta bloggfærsla sem ég hef skrifað, hugsa ég. Þori þó ekki alveg að fara með það.

Mig minnir að ég hafi einu sinni skrifað styttri færslu sem innihélt bara spurningamerki og hlekk á það, sem vísaði í eitthvað merkilegt.

Viðbót: Eftir að hafa skoðað þetta nánar hef ég komist að því að þetta er ekki stysta færsla sem skrifuð hefur verið af mér. Ég biðst afsökunnar á að eyða tíma ykkar í ekkert.

miðvikudagur, 15. október 2008

Svona varð gærdagurinn og hluti dagsins í dag:

09:00 Vakna of seint. Fer í vinnuna.
12:30 Hádegismatur.
13:00 Excel námskeið.
16:00 Vinna.
19:30 Vinna búin. Borða.
20:00 Vinn í Arthúr.
23:30 Vinn við tölfræði UMFÁ.
01:30 Fer í sturtu.
01:50 Fer að sofa.
02:00 Dreymi Excelvinnslu.
05:00 Dreymi augnskugga.
05:15 Dreymi meiri Excelvinnslu.
09:00 Vakna of seint. Fer í vinnuna úrvinda eftir erfiða Excel vinnunótt.

Dagurinn í dag er ca nákvæmlega eins, nema ekkert Excelnámskeið, meira af bíóferðum og smá dagdraumar um Excel.

Og til að hafa það á hreinu þá lítur Excel svona út í (dag)draumum mínum, nema með fleiri föllum.
Örstutt: Tölfræði leiks UMFÁ gegn Leikni R á mánudaginn er að finna hér.
Jæja það er komið að hittingi hjá Reyklausa liðinu. Síðasti hittingur gekk mjög vel og var myndavél á staðnum. Myndbandið er hér að neðan.



Að þessu sinni ætlum við að hittast á Hlemmi klukkan 19:00 í kvöld (miðvikudaginn 15. október 2008) og valhoppa niður Laugarveginn í Henson samfestunum okkar og með hárböndin. Kannski við getum sannfært einhvern reykingamanninn í ræsinu til að hætta þessum ósið. Koma svo! Hoppfæv!

þriðjudagur, 14. október 2008

Í kvöld fór fram fyrsti leikur UMFÁ á tímabilinu í körfubolta. Leikurinn var gegn Leikni R og á heimavelli UMFÁ (sem er mitt lið!).

Löng saga stutt:

UMFÁ 103
Leiknir 93


Maður leiksins: Daði með 31 stig.

Magnaður leikur, körfubolti. Meira um það síðar.

Nú tekur við 5 daga frí frá hreyfingu fyrir mig sem er skipun frá þjálfara UMFÁ, til að losa mig við meiðsli. Ef einhver sem les þetta vinnur í Húsasmiðjunni, ekki selja mér reipi í lok vikunnar, sérstaklega ekki ef ég er grátandi.

mánudagur, 13. október 2008

Til er ein gerð af fólki sem fer ótrúlega í taugarnar á mér. Það er fólk sem les blogg þegar það á að vera að vinna. Ekki bara er það ótillitssamt og ógeðslegt heldur er það einnig yfirleitt heimskt og feitt.



Sjá nánar hér.

Þið hafið hérmeð tekið þátt í staf- og listrænum gjörningi. Hann endurspeglar hvorki skoðanir mínar né ritstjórnarinnar.

laugardagur, 11. október 2008

Í kvöld var mér boðið á djammið. Ég neitaði. Þess í stað varð mitt laugardagskvöld svona:


Á myndinni má sjá:

[X] 2 lítrar af mjólk.
[_] Tónlist.
[X] Erótísk spennubók með Excel ívafi.
[X] Banani.

Hollustan og heilbrigður lífsstíll í fyrirrúmi, þar sem fyrsti leikur körfuboltatímabilsins er á mánudaginn (kl 19:15 í íþróttahúsi Álftaness).

föstudagur, 10. október 2008

Ef syfja væru úttektir peninga, líkamleg þreyta væri skurður á erlendar lánalínur og ég væri banki þá væri ég líklega farinn á hausinn og yfirtekinn af rúminu mínu, að því gefnu að rúmið mitt væri Íslenska ríkið.

En samt ætla ég í ræktina eftir vinnu í dag. Sumir segja óábyrg líkamsmálastefna, ég segi áframhaldandi útrás.

fimmtudagur, 9. október 2008

Gærdagurinn gat ekki liðið nógu hratt. Ég reyndi að láta hann líða hraðar með ýmsu móti, m.a. með því að ýta jörðinni réttsælis og hlaupa undan sólinni, en allt kom fyrir ekki.

Ástæðan er mjög slæmur hárdagur (ens.: bad hairday). Eftirfarandi háratburðir gerðust:

* Ég gleymdi að setja gel í hárið. Það hlýddi mér ekki það sem eftir lifði dags.
* Í vinnunni spurði samstarfsmaður minn mig hvort ekki væri allt í lagi í einkalífinu í kjölfar hárgreiðslunnar, eða skorti þar á.
* Ég gleymdi svitabandi fyrir körfuboltaæfingu sem heldur hárinu í skefjum. Ekki falleg æfing.
* Hárið var með rætið grín í garð minnihlutahóps á einum tímapunkti, enda gjörsamlega stjórnlaust.

Fleira tengt hárinu á mér gerðist ekki þann daginn. En í dag er risinn nýr dagur með nýjum hárævintýrum. Ég hlakka til að takast á við þau.

miðvikudagur, 8. október 2008

Andleysi = Kvikmyndagagnrýni.
Mikið andleysi = Kvikmyndagagnrýni síðasta mánuðinn.

Hér er listi yfir myndir bíóhúsanna og umsögn:

Babylon A.D.
Hef ekki séð hana. Vísindamenn, byssur, sprengjur og morð. Mig langar að sjá hana.

Burn After Reading
Nýja Cohen myndin. Fjallar um vesen hjá CIA sem tengist mútum, framhjáhaldi, lítaaðgerðum, ævisögu og Barða Hamar. Vel leikin, þó Frances McDormand sé orðin þreytt. Það vantar þó talsvert upp á hjá Cohen að þessu sinni (hint: kynlífssenu).
2 stjörnur af 4.

Charlie Bartlett
Ungur, ríkur og úrræðagóður drengur fer í nýjan skóla, þar sem hann er alltaf rekinn fyrir að afla sér vinsælda með ólöglegum hætti. Mjög öðruvísi mynd. Anton Yelchin, sem leikur Charlie Bartlett mun líklega verða næsti Bob Hope, eða einhver.
Ágætis afþreying í mesta lagi.
2 stjörnur af 4.

Death Race
Kreppan er skollin á í Bandaríkjunum og fangelsin afla sér fjár með raunveruleikakappakstri þar sem keppendur geta dáið. Sirka myndin Running man + bílar. Mjög raunveruleg mynd, eftir að kreppan braust út öskrandi.
12 sprengjur í myndinni, sem gera 2,5 stjörnur af 4.

Journey to the Center of the Earth
Hef ekki séð hana.

Mamma Mia
Karlmenn mega ekki sjá hana. Samtök gagnkynhneigðra banna það.

Mirrors
Hef ekki séð hana og mun líklega aldrei fara á hana. Á erfitt með að finna einhvern sem vill fara með mér pissublautum úr bíósalnum.

Pathology
Hef ekki séð hana. Ég mun líklega ekki sjá hana. Viðbjóður, að sögn. En ég veit ekki. Mér finnst Milo Ventimiglia ekki það ógeðslegur. Svo er ég ekki rasisti.

Pineapple Express
Dóphaus í vinnu(!!) verður vitni að morði. Upp hefst æsilegur eltingaleikur. Fyndin mynd en eins og alltaf frá þessum handritshöfundi finnst mér eitthvað vanta (t.d. kynlífssenu). Trailerinn fyrir myndina er eiginlega betri en myndin.
Allavega, fín afþreying.
2 stjörnur af 4.

Reykjavík - Rotterdam
Skuldum vafinn fyrrum glæpamaður og fjölskyldufaðir ákveður að smygla áfengi (af öllu sem hægt er að smygla) frá Hollandi til að borga íbúð og bjarga bróður konu sinnar frá því að vera settur í pappírstætara af handrukkurum.
Vel gerð og leikin mynd, spennandi og skemmtileg, þó sagan sé ótrúverðug á köflum. Það er ekki oft sem maður heldur með einhverjum í íslenskri mynd, en það gerðist þarna við mikinn pirring viðstaddra bíógesta.
3,5 stjörnur af 4.

Step brothers
Will Ferrell mynd. Hann á stjúpbróðir í þessari mynd. Afþreying, ekkert meira.
1,5 stjarna af 4.

Sveitabrúðkaup
Fólk ætlar að gifta sig í sveit. Taka rútur þangað og villast. Ef einhver hefði bara spurt út í nafnið á sveitabænum þar sem brúðkaupið átti að fara fram þá hefði þessi mynd ekki þurft að verða til.
Rosalega vond mynd. Bæði leiðinleg og uppfull af drama, sem er ekki fyndið.
4 stjörnur af 250.000.

Tropic Thunder
Prímadonnuhollywoodleikarar eru fluttir til Víetnam til að ná raunverulegri senum. Mjög fyndnir leikarar, sérstaklega Jack Black, í skondnum söguþræði. Tom Cruise stelur senunni í aukahlutverki. Eitthvað vantar þó, eins og alltaf. Í þessu tilviki bæði dans- og söngvasenu ásamt væmnu ástaratriði.
2,5 stjörnur af 4.

Wild Child
Hef ekki séð þessa virðulegu mynd en OMG mig langar gegt ekkva að sjá hana, skiluru. P.s. not.

þriðjudagur, 7. október 2008

Í gærkvöldi benti ég öllum vinum mínum á að, samkvæmt áreiðanlegum heimildum, væri bensínið að hækka í dag um allt að 20 krónur/líterinn vegna gengishruns krónunnar.

Ég sagði fólki að hætta því sem það var að gera, hlaupa á næstu bensínstöð (helst nakið) og taka allt það bensín sem það gæti, eins og ég gerði.

Í morgun lækkaði bensínið um 11 krónur/líterinn.

Ef við gerum ráð fyrir að hver vina minna hafi tekið 40 lítra af bensíni í gær í stað þess að bíða með það til dagsins í dag þá fáum við að hver vina minna hafi eytt 440 krónum vegna mín (40 lítrar * 11 krónur).

Ef við margföldum þessa tölu svo með fjölda vina minna þá fáum við út að ég hef valdið 0 króna skaða alls (440 krónur * 0 vinir). Fjúkk að ég á enga vini.

mánudagur, 6. október 2008

Þetta er síðasta færslan í bili um kreppuna, ég lofa.

Nýlega spurði vinur mig, háttvirtan Viðskiptafræðinginn, hvaða langtímaáhrif atburðir dagsins gætu haft á íslenskt efnahagslíf og umhverfi.

Til að höfða betur til vinar míns, sem er ekki virðulegur Viðskiptafræðingur eins og ég, þá klæddi ég mig úr að ofan og makaði drullu yfir andlitið á mér. Svo dansaði ég um eins og simpansi áður en ég pissaði á hann.

Þá sagði hann mig hálfvita og lét sig hverfa. Mér gafst því ekki tækifæri á að ausa úr Viðskiptafræðiviskubrunni mínum. Þetta fær maður fyrir að reyna að útskýra ástandið fyrir þeim sem ekki eru mikils metnir Viðskiptafræðingar, eins og ég.

Allavega, ef fólk er að velta þessu fyrir sér þá er svarið hér: Hafiði séð bíómyndina Apocalypto eftir Mel Gibson? Þannig munu Íslendingar búa, í grófum dráttum, eftir nokkrar vikur. Það er mitt Viðskiptafræðiálit.
Ég man mjög vel hvað ég hef verið að gera á meðan helstu atburðir í lífi mínu áttu sér stað. Hér eru tæmandi listi:

* 11. september 2001: Árás á tvíburaturnana. Ég var sofandi eftir næturvakt. Vaknaði ca 7 tímum eftir árásina í góðum gír.

* 11. september 2002: Anna Lindh myrt. Ég lagði mig eftir vinnu og svaf þetta af mér.

* 17. janúar 2003: Ég sló svefnmet með því að sofa 24 klukkutíma samfleytt. Ég var sofandi.

* 19. júní 2003: Styrmir bróðir eignast fyrsta barn okkar systkina; Kristján Frey. Ég var steinsofandi, einhverra hluta vegna.

* 5. janúar 2008: Missti sveindóminn. Náði að sofa það af mér. Tilkynnti lögreglu þegar ég vaknaði.

Og nú það nýjasta:

* 6. október 2008: Geir H. Haarde tilkynnir að sá síðasti til að yfirgefa Ísland eigi að slökkva á eftir sér. Ég var að blogga. Þessa færslu.

laugardagur, 4. október 2008

Hér er skákgetraun dagsins:


Svartur gefur í einum leik.

Fyrir rétt svar fæst píanó í verðlaun að verðmæti kr. 500.000.

Tekið úr skák gærkvöldsins.
Í vikunni sem leið einbeitti ég mér að því að vera svalur. Ég byrjaði á að ganga með linsur hvert sem ég fer svo fólk hætti að benda, hlæja og kasta hlutum í mig fyrir að vera með gleraugu.

Svo fór allt niður á við. Ég fór á námskeiðið Excel III á fimmtudaginn þar sem kennt er forritun í Excel. Tvennt nördalegt gerir ekki eitt svalt, því miður.

Seinna sama dag hjálpaði ég ungri dömu með bókfærsluverkefni og annarri dömu við að koma netinu í tölvunni sinni í lag.

Til að fullkomna svo ósvalheitin eyddi nýtti ég gærkvöldið í að tefla 1. umferð með Skáksveit Austurlands á Íslandsmótinu í Sveitaskák. Umferðin fór illa (3,5-2,5 fyrir Víkingahópnum).

Hér er hægt að sjá skákina mína. Ég var með hvítt. Því miður vann ég skákina, til að undirstrika að ég verð aldrei svalur.

föstudagur, 3. október 2008

Í dag, þegar ég var um það bil að fá heilablóðfall úr stressi yfir þessari kreppu og slöku gengi íslensku krónunnar, uppgötvaði ég að allt þetta stress er óþarfi. Ég á nefnilega um 50 dollara á pókerreikningi á netinu sem gera um 250.000.000 króna.

Frekar súrt að átta sig á því svona seint að það hefði verið sniðugra að fjárfesta í erlendri mynt síðustu 10 ár en ekki Risa hrauni.

fimmtudagur, 2. október 2008

Þessi færsla átti að vera ca svona:

„Kreppan er skollin á og Íslendingar súpa hveljur og lepja dauðann úr skel. En hlutirnir gætu verið verri. Það gæti allt verið á kaf í snjó og ég stofnandi öllum í lífshættu með því að vera með fullkomlega sléttar túttur undir bílnum mínum.

Engin önnur leið að því að hlutirnir verði verri er möguleg.“

Í kvöld reið svo enn eitt áfallið yfir þjóðina; ég er með stórkostlega sléttar túttur undir bílnum mínum í staðinn fyrir dekk. Og svo fennti Reykjavík og nágrenni í kaf.

Nú væri gott að vera reipisframleiðandi og græða á tá og fingri, hvort sem er á fólki sem er að festa sig út um allt á bílunum eða myntkörfulánafólki.

miðvikudagur, 1. október 2008

Þessi vika byrjar ekki vel:

* Krónan hrynur í verði.
* Bankar eru yfirtekinn af Davíð Oddssyni sem mun líklega valda gjaldþroti víðsvegar.
* Paul Newmanar eru deyjandi út um allt.
* Hjólabátar eru bilandi um allar Víkur.

En ekki eru allar fréttir slæmar. Vísir horfir á björtu hliðarnar og birtir eina bestu frétta sem ég hef lesið séð á ævi minni (hér). Áfram Vísir!
Ég hef gefist upp á krónunni. Hún fellur næstum jafn hratt og íslenska fótboltalandsliðið niður alþjóðlega styrkleikastigann.

Ég hef því ákveðið að selja allar mínar krónur. Þær er hægt að kaupa með kynlífi, eina alvöru gjaldmiðlinum.

Ef einhver veit um áhættusækinn viðskiptasnilling sem er til í að skipta kynlífi fyrir verðlausar krónur, látið mig vita.