föstudagur, 29. september 2006

Nýlega fékk ég bólu á aðra kinnina. Mér fannst það slæmt aðallega vegna þess að andlitið á mér var ekki lengur symmetrískt. Ég ákvað því, til að laga vandamálið, að fara ekki í sturtu í talsverðan tíma.

Viti menn, í dag er ég með bólu á báðum kinnum, enninu, hökunni og nefinu. Ég hef aldrei verið jafn symmetrískur og lífið er gott.
Í bílasölublaði sá ég fyrir einhverju síðan að Peugeot 206, eins og ég á, var fyrir einhver einkennileg mistök flokkaður sem konubíll. Ég ákvað að framkvæma smá rannsókn á þessu og byrjaði að telja karlmenn sem ég hef séð í þessari gerð bíla.

Hingað til hef ég náð að telja 27 karlmenn á móti 25 konum.

Rannsóknin var framkvæmd í 25 bíltúrum þar sem leyft var að telja sama aðilann oftar en einu sinni. Leyfilegt var að telja undirritaðan með.

miðvikudagur, 27. september 2006

Hvað myndi ykkur finnast um að hver og einn væri skráður í ráðandi stjórnmálaflokk hvers tíma þegar hann fæddist? Eða í aðdáendaklúbb vinsælasta poppstyrnis hvers tíma (það væri þá Magni fyrir börn sem fæðast þessa dagana)? Eða jafnvel bara í skákklúbb íslands?

Hvað ef þessi klúbbur myndi fá umtalsvert fé frá ríkinu? Peninga sem þú værir búinn að vinna fyrir ríkið og greiða í skatta.

Segjum svo að þessi umræddi klúbbur eða stjórnmálaflokkur snérist ekki um neitt nema heilaþvott á ungbarnaárunum? Að hann snérist um að halda einhverju fram sem er rangt? Að heilaþvotturinn væri svo rosalegur að jafnvel á fullorðinsárum trúir fólk þessu ennþá og viðheldur þessu fyrirkomulagi?

Ég væri allavega ósáttur.

Sem betur fer er ég löngu búinn að skrá mig úr þjóðkirkjuruglinu. Þið getið það líka. Hér fyrir eldri en 16 ára. Hér fyrir yngri en 16 ára.

þriðjudagur, 26. september 2006

Af ótta við að hræða fólk frá því að lesa þessa færslu þá ætla ég ekki að taka fram að í henni felist tölfræði.

Fyrstu 27 ár ævi minnar fór ég í 4 matarboð. Það var aldrei auðvelt fyrir fólk að bjóða mömmu og pabba í matarboð með 5 krakka með sér. Því fór sem fór; 4 matarboð. Mér finnst það nokkuð góður árangur.

Síðan ég byrjaði með Soffíu fyrir 14 mánuðum síðan hefur mér verið boðið í 12 matarboð.

Fyrir tíð Soffíu fór ég í 4 matarboð á 27 árum sem gera tæplega 0,15 matarboð á ári.
Eftir að ég byrjaði með Soffíu hef ég farið í 12 matarboð á 14 mánuðum sem gera ca 10,29 matarboð á ári.

Þetta gerir aukningu á matarboðum um hvorki meira né minna en 6843% síðan ég byrjaði með Soffíu.

Þetta eitt og sér er stórmerkilegt. Það sem mér finnst hinsvegar merkilegra er að ef ég hefði farið í 10 matarboð á ári fyrir tíð Soffíu hefði mér, með þessari prósentuaukningu, verið boðið í 694 matarboð á ári eftir að hafa hafið samband með henni. Það gera 1,9 matarboð á dag.
Þessi nýji vinnustaður er skemmtilegur. Hér er fullt af fólki sem er alltaf hlæjandi. Og bendandi á mig.

mánudagur, 25. september 2006

Ég hef hafið nýtt heilsuátak. Mér er það algjörlega ómögulegt að heilsa fólki á morgnanna og ætla ég að breyta því. Vonir eru bundnar við að ég nái að bæta á mig 10 kg með þessu átaki þar sem ég hætti vonandi að svitna við tilhugsunina um að heilsa ókunnugu fólki.

laugardagur, 23. september 2006

Mér finnst rétt að benda á að þessi frétt kemur því ekkert við að ég hóf störf hjá 365 sama dag og krafðist launa 20 meðalstarfsmanna. Ég hef orðið fyrir talsverðu aðkasti vegna þessarar fréttar.

föstudagur, 22. september 2006

Ég er svo þreyttur að ég veit ekkert hvað ég er að gera lengur. Einnig slefa ég úr þreytu. "Af hverju ertu þá að blogga?" kunnið þið að spyrja. Ástæðan er hér að ofan, ég veit ekkert hvað ég er að gera lengur.

Fyrsti vinnudagurinn hjá 365 á morgun og ég á eftir að raka mig. Það má búast við því að ég verði alblóðugur í vinnunni á morgun. Flott fyrstu áhrif það.

fimmtudagur, 21. september 2006

Í gærkvöldi spilaði ég póker í annað sinn á einni viku. Í gærkvöldi vann ég póker í annað sinn á einni viku.

Þá hef ég grætt kr. 8.000 á einni viku. Einnig hef ég grætt 6 karlmenn.

Ég vildi nú samt að ég hefði tapað í bæði skiptin þar sem þessi bloggfærsla er býsna óáhugaverð svona.

miðvikudagur, 20. september 2006

Í nótt sagði Helgi bróðir mér svo góðan brandara í einum af ca 25.000 draumum mínum að ég hló upphátt. Svo hátt að Soffía vakti mig, haldandi að ég væri grátandi.

Takk Helgi fyrir að valda því að við Soffía vöknuðum bæði. Takk kærlega!

þriðjudagur, 19. september 2006

Í fréttum er þetta helst:

* Ég er kominn með vinnu hjá 365 við tölfræðilega úrvinnslu á gögnum. Starfið smellpassar svo við áhugasvið mitt að ég er á mörkum þess að fá heilablóðfall af spennu í hvert skipti sem ég man að ég er kominn með vinnu. Ég byrja á föstudaginn.

* Ég fór út á lífið í fyrsta sinn í amk 13 mánuði á föstudaginn þegar ég mætti á skemmtistaðinn Sportkaffi, nágranna mínum. Þar var stórskemmtileg hljómsveit að spila og ömurlega fínt fólk að hlusta. Ég spilaði pool við Kristján Orra og sigraði mjög óöruggt.

* Ég mætti í partí á laugardagskvöldið til Gylfa, stórkunningja, þar sem samankomnir voru fullt af Fellbæskum strákum að kveðja Garðar Eyjólfs sem fór utan daginn eftir. Allavega, við enduðum á því að spila póker upp á peninga og ég stóð uppi sem sigurvegari. Ef lögreglan les þetta; peningar = epli.

* Ég spilaði veggtennis tvisvar um helgina. Í fyrra skiptið við Björgvin bróðir. Ég sigraði. Í seinna skiptið við Daníel fyrrum skólafélaga. Ég sigraði þar líka.

Ástæðan fyrir þessum sigursögum er einföld. Ég hef tapað nógu oft í einhverju sem skiptir máli. Löngu kominn tími á sigursögur.

mánudagur, 18. september 2006

Þessi færsla er bara fyrir kjötæturnar þarna úti. Segið svo að ég geri aldrei neitt fyrir ykkur.

Gjörið svo vel.

sunnudagur, 17. september 2006

Ég fór í bíó um daginn á Clerks II. Ég nenni ekki að skrifa meira um það núna.

Ég hef verið að spila veggtennis af grunsamlega sjúkum áhuga. Ég nenni ekki heldur að skrifa um það.

Ég er kominn með atvinnutilboð hérna, loksins og sennilega tvö. Ég nenni ekki ræða það nánar.

Ég er orðinn mjög þreyttur og þarf að fara að sofa. Ég er á mörkum þess að nenna því en ég læt mig hafa það í þetta sinn.

föstudagur, 15. september 2006

Þá ætla ég að bregða á það ráð að herma eftir NFS og fletta í gegnum fréttirnar hérna:

* Ef einhverntíman er ástæða til að míga yfir símaskránna og hætta að stunda viðskipti við þetta mjög illa nefnda fyrirtæki (já.is), þá er það núna. Þvílík siðspilling. Þvílík peningagræðgi. Þvílíkir hálfvitar.

* Ég get ekki lesið þessa frétt. Ég las fyrsti tvö orðin og gafst upp. Gangi ykkur vel. Ég held að öllum sé nákvæmlega sama um þetta.

* Í heimi þar sem allt er að fara til helvítis er gott að lesa góðar fréttir annað slagið. Hér er ein slík.

Ég nenni þessu ekki. Fréttir sökks.

fimmtudagur, 14. september 2006

Ég geri ekki svona venjulega en nýlega heyrði ég lag sem hefur fullkomlega náð að festa sig í hausnum á mér. Svo sá ég myndbandið og mér fannst ég verða að deila því með einhverjum. Þetta er lagið The one með íslensku sveitinni Trabant, með Rassa Prump fremstan í flokki. Gjörið svo vel:

miðvikudagur, 13. september 2006

Ég var að taka eftir því að ég borða ekki Intake Gain frá Sylvester Stallone. Ég er að borða Intake GAIN! með upphrópunarmerki og í hástöfum. Ég gerði mér vonir um að þykjast þyngjast áður en ég vissi þetta en núna hækka kröfurnar til próteinsins margfalt! Rétt eins og ykkar krafa til síðustu setningar hækkar við upphrópunarmerkið í endann.

þriðjudagur, 12. september 2006

Í gær uppgötvaði ég nýjan mat; sojakjöt. Um daginn eldaði ég sojahamborgara og í gær prófaði ég sojapylsur. Báðir réttir bragðast fáránlega vel án fitunnar og holdsins sem fylgir venjulegu borgurunum og pylsunum.

Það er aðeins eitt slæmt við þetta, ég hef heyrt að í sojapyslunum sé aðeins notað afgangsafurðir; nef, eyru og rassgöt af sojabaunum.

mánudagur, 11. september 2006

Gaman að segja frá því að ég er í jakkafötum þegar þetta er ritað.

Þess vegna skrifa ég sem minnst af orðum sem hafa stafinn ö í sér, það er svo erfitt að teygja sig í hann í þessum helvítis jakka.

sunnudagur, 10. september 2006

Æ já. Ég er með blogg.

Allavega, ég fór í mitt fyrsta partí í yfir ár í gær. Það var haldið heima hjá Björgvini og spúsu hans, Svetlönu og var að því tilefni að þau eru byrjuð að leigja saman. Teitið varð merkilegt fyrir þær sakir að í því voru grænmetisætur í meirihluta eða um 70%.

Partíið var mjög skemmtilegt og fær það 10 í einkunn af 10 mögulegum.

Það gera 0,04 í einkunn fyrir hvert kíló af osti sem ég borðaði í teitinu.

fimmtudagur, 7. september 2006

Ég steingleymdi að segja frá því hér að um daginn, þegar ég ætlaði að fara yfir uppáhalds hossuna mína á Bjarna Fel (Peugeot bifreið mín), að útsendari mömmu.is svínaði fyrir mig svo ég snarhemlaði og flaug tugi metra.

Allavega, mamma.is svínaði á mig.

Þegar ca 50 cm voru í að ég klessti á mömmu.is hugsaði ég á nýjum hraða. Ég náði að hugsa um að hringja á lögregluna, skýrslutökuna, kostnað við viðgerð á Bjarna Fel, að tala við mömmu.is og vera fúll og að síðustu hvernig leigubíl ég ætti að fá mér á þessari einu sekúndu sem leið þangað til það kom í ljós að ég var kominn úr hættu.

Mér reiknast að það sé um 263 km hugsanahraði á klukkustund.

miðvikudagur, 6. september 2006

Í Melrose Place í vikunni réðist nýjasti karakterinn, Rikki (sem er kvenmaður) á bar Jakes, sem heitir Shooters og rústaði honum í skjóli nætur. Sydney, vinkona hennar, var ásökuð um að hafa gert þetta.

Mér leikur forvitni á að vita eitt; hvernig stendur á því að svona klikkaður einstaklingur er ráðinn í þennan þátt? Er bakgrunnur hvers og eins ekki athugaður áður en viðkomandi leikari er ráðinn?

Og síðast en ekki síst; af hverju í ósköpunum er Sydney ásökuð um þennan glæp þegar myndatökumennirnir geta vitnað um að þetta var Rikki!

Þessir þættir gera mig svo reiðan!!

þriðjudagur, 5. september 2006

Mér finnst alltaf svo...

...jæja ég má ekki vera að þessu. Verð að skreppa í sturtu og raka mig. Ég er nefnilega að fara í mikilvægt starfsviðtal á morgun.

Þessi setning felur næstum þá staðreynd að ég er atvinnulaus aumingi og dragbítur samfélagsins þessa dagana.

Næstum.

mánudagur, 4. september 2006

Ég var að koma úr starfsviðtali þar sem ég byrjaði sallarólegur og afslappaður. Þegar leið á viðtalið varð ég alltaf meira og meira taugaspenntur þar til undir lokin að ég var orðinn löðrandi sveittur og stamandi.

Ástæðan var sú að á bakvið manninn sem tók viðtalið við mig var stærðarinnar geitungur að sveima um. Ég hata geitunga!

Ég fæ annars sennilega starfið.

p.s. útlitið á síðunni er eitthvað brenglað. Ástæðan er upprið hjá brinkster.com sem hýsir flest á síðunni. Þetta lagast innan tveggja daga. Góð þjónusta.
Í dag fór ég í sjoppu, spurði hvort sunnudagsmogginn væri enn til og þegar hann var ekki til þakkaði ég fyrir mig og fór út.

Þetta er sennilega eitt stærsta skref sem ég hef tekið í átt að heilsusamlegu líferni. Ég fór í sjoppu og keypti mér ekkert nammi!

Að hugsa með sér. Fyrir mánuði síðan hefði ég aðeins getað látið mig dreyma um svona sjoppuferð.

laugardagur, 2. september 2006

Ég skrapp örstutt í kringluna í dag. Í fyrsta sinn tók ég eftir því að hver einasta kvenkyns manneskja þar var elgmáluð frá toppi til táar, fyrir utan Soffíu mína og systir hennar.

Hvenær varð sjálfstraust kvenna svona lítið?

Ef sjálfstraust kvenna mælist á bilinu 0-10; málningarlaus kona mælist í 10 og hvert kg af farða framan í þeim lækkar sjálfstraustið um 1 stig þá mælist meðal sjálfstraust kvenna sem hanga í kringlunni í 1,2 stigum.

Kvenfólk utan kringlunnar mælist í 9,97, samkvæmt nýlegum mælingum sænskra vísindamanna.

föstudagur, 1. september 2006

Æ já. Ég er kominn með netið og er staddur í Reykjavík, úti í rassgati nánar tiltekið.

Ég blogga fljótlega eitthvað stórsnjallt og risafyndið (mínus "stór" og "risa".

Og "fyndið".

Og "snjallt".