Veðurannáll 2013

Ég er oft spurður þriggja spurninga:

1. Hvenær ætlarðu að blogga aftur?
2. Hvenær ætlarðu að skrifa um árið 2013, þar sem ýmislegt fróðlegt gerðist í þínu lífi?
3. Hvenær ætlarðu að hætta að vera svona sjálfhverfur?

af sjálfum mér. Svarið er: núna.

Excel æði ungra kvenna

Þessa stuttu og snaggaralegu frétt las ég brosandi eyrnanna á milli. Fréttin segir frá því að Justin Timberlake sé alveg eins og ég: að hann komist ekki í gegnum daginn án þess að nota Microsoft Excel skjöl.

Brosið breyttist þó fljótt í skeifu þegar ég googlaði Justin Timberlake og Excel, og fann þessa glænýju frétt.

Þarna kemur fram að unnusta Justin Timberlake segir hann "excela" (ísl. að skara fram úr) í öllu sem hann taki sér fyrir hendur.

Skeifan breyttist svo í hrossahlátur þegar ég áttaði mig á þessari fáránlegu þýðingarvillu hjá Mogganum.

Viðbót: Fréttin var fjarlægð, skiljanlega. Hér að neðan er skjáskot af deilingu minni á fréttinni á Facebook, þegar ég var hættur að mestu að skjálfa yfir Excel blæti Justin Timberlake. Þarna sést allur textinn um Excel notkun hans.

Annars er mannlegt að gera mistök sem þessi. Sjálfur hef ég lagað innsláttarvillur ca 20 sinnum síðan ég skrifaði þessa færslu.

Viðbót 2: Komin er ný frétt í stað þeirrar sem var eytt fyrr í dag. Sjá hana hér. Mogginn viðurkennir auðvitað mistökin eins og allir alvöru miðlar gera og býður upp á Excel námskeið fyrir einn heppinn lesanda til að toppa allt saman. Vel gert. Meira svona.

Kjörþyngd

Eftir áralanga baráttu við ókílóin (andstæða aukakílóa) hef ég náð að festa mig í kjörþyngd, 90 kílóum. Lengst af var ég á milli 75 og 85 kílóa.

En hvað er ég þá að borða mikið af kalórium á dag? Og hvað myndi ég vera þungur ef ég minnkaði hreyfingu mína eða yki (það er orð) hana?

Hvað ef ég þróaði með mér áráttu- og þráhyggjuröskun og vildi í framhaldinu bara borða nákvæmlega 3.000 kalóríur á dag, hvað ætti þá að vera þungur?

Þetta þurfti ég að setja í Excel skjal, eftir að hafa fundið formúlur um þetta á intervefnum. Hér er niðurstaðan:

Smellið á mynd fyrir stærra eintak og farið hingað ef þið viljið slá inn ykkar upplýsingar í Excel skjalið.

Smáhúsnæðislán

Seinni partinn í dag vaknaði ég við þá tilhugsun að stofna smálánafyrirtæki sem einbeitti sér að húsnæðislánum.

Svo ég ræsti Excel og rifjaði upp hvernig vextir þessara fyrirtækja virka.

Þarna má sjá hvernig ársvextir okurlá smálánafyrirtækisins 1909 eru við lengd nokkurra mismunandi upphæða.

Lengsta lánið með hæstu upphæðinni er með 427% ársvexti, sem væri ágætis viðmið þegar kæmi að húsnæðissmálánafyrirtækinu mínu. Smálánin eru endurgreidd í einu lagi, með vöxtum, sem gera þau að kúluláni. Það væri líklega fínt viðmið.

Segjum sem svo að einhver fáráður vildi taka 20 milljón króna smálán hjá mér fyrir íbúð, til 40 ára, eins og vaninn er, nema að hann ætlaði að borga það allt að lánstíma loknum.

Endurgreiðslan yrði 1.461.086 kvintilljónir eða 1,4 milljón kvintilljónir (kr. 1.461.086.227.569.500.000.000.000.000.000.000.000).

Einhverjir myndu kannski kvarta undan því að eiga erfitt með þessa afborgun, svo ég þyrfti líklega að bjóða upp á mánaðarlega afborgun.

Með 427% ársvöxtum yrði þá meðal mánaðarleg jafngreiðslulánsafborgun af 20 milljón króna láni rúmlega 7,1 milljón eða tæpar 6,2 milljónir ef viðkomandi myndi vilja jafnafborgunarlán.

Ég efast þó um að ég myndi bjóða upp á þann möguleika. Það yrði varla þess virði.

Hitt og þetta

Þetta er að frétta:

Ég bætti við fjórförum á fjórfarasíðuna
Að þessu sinni eru þeir fengnir frá Baldri Beck, körfuboltagúrú með meiru. Sjá hér.

Ég bætti við Excel skjali á Excel.is síðuna
Skjalið sýnir tölfræði leikmanna í Iceland Express deildinni í körfubolta karla nýliðið tímabil (2011-2012, regular season) og býður upp á uppraðanlegar töflur eftir tölfræðiatriðum. Sjá hér.

Óþægileg uppgötvun
Mér finnst alltaf jafn leiðinlegt að átta mig á því að ég er úr kjöti. Fáránleg tilhugsun.

Kvenhylli í ræktinni
Í kvöld ætlaði ég að fara á skíðavél í ræktinni í rólegheitum og hugsa minn gang, eins og venjulega. Þegar þangað var komið og ég farinn að svitna lítrum hrúgaðist kvenfólk allt í kringum mig.

Í fyrstu hélt ég að þetta væri grín svo ég hunsaði þær en þegar 20 mínútur voru liðnar og enn að bætast við kvenfólk var mér hætt að lítast á blikuna. Svo truflandi fannst mér þetta að ég var hættur að geta einbeitt mér að Gossip girl sem var á risavöxnum sjónvarpsskjá fyrir framan skíðaavélarnar. Ég neyddist því til að skipta yfir í hjólin, sem eru með innbyggðu sjónvarpi. Þetta dugði til að hrista þær af mér, í þetta skiptið.

Ensku deildirnar í Excel skjali

Ég er ekki stoltur af mörgu sem ég hef gert í lífinu. Hér er listinn:

• Pínulítið málverk sem ég gerði 2006.

Síðustu vikur hef ég verið að vinna í Excel skjali sem er orðið nógu gott til að ég þori að deila því með fólki. Það er kannski ekki mjög nytsamlegt eða skemmtilegt. Eða jafnvel áhugavert. En það tók mikinn tíma að plana, reikna, stilla og setja upp.

Skjalið tekur allar deildir enska boltans og simulate-ar þær, leik fyrir leik, svo úr koma nokkuð raunveruleg úrslit. Hægt er að stilla styrkleika hvers liðs í skjalinu og leika eins mörg tímabil og maður vill. Þegar tímabil er endurræst koma ný úrslit þegar umferðirnar eru leiknar. Núverandi stillingar liðanna í skjalinu eru reiknaðar út frá stöðu deildarinnar um síðustu helgi.

Hægt er að nálgast skjalið hér.

Þar með hefur listinn yfir hluti sem ég hef gert og er stoltur af lengst um 100%.

Það gefur mér afsökun til að lengja listann yfir hluti sem ég skammast mín fyrir um sama prósentustig. Vinsamlegast klæðið mig í föt ef þið sjáið mig afvelta einhversstaðar niðri í bæ næstu daga.

Fótboltahermun

Þegar ég var lítill og það var ekki nógu gott veður til að hlaupa um öskrandi, þá settist ég í eldhúsið heima og hermdi eftir fótboltaleikjum með spilabunka.

Þetta blæti mitt varð alltaf stærra og stærra. Þegar hæst stóð var ég kominn með deild af liðum sem spiluðu öll hvort við annað og töflu yfir stöðuna eftir hverja umferð. Ég veit ekki hversu mörg tímabil voru spiluð en ég á einhversstaðar tugi stærðfræðibóka, fullar af deildum og töflum.

En það var þá. Nú er ég kominn með Excel.

Nýlega gerði ég smá skjal í Excel sem hermir eftir 12 liða fótboltadeild. Úrslitin ráðast af styrkleika hvers liðs í vörn, á miðju og í sókn ásamt smá líkindalíkani og auðvitað tilviljun. Lítið mál er að breyta nafni liða og styrkleika.

Hér er hægt að nálgast skjalið.

Smá leiðbeiningar:

• Skjalið er svokallað Macro skjal, sem krefst þess að Macro-ar séu virkjaðir eftir að það er opnað. Annars er kemur það tilbúið til notkunar.
• Smellt er á hakið við þá umferð sem spila skal, svo hún verði hermuð.
• Taflan yfir stöðuna uppfærist eftir hverja umferð.
• Hægra megin við töfluna er styrkleiki hvers liðs eins og stillt er í 'Grunnstillingar' sheetinu.
• Í 'Grunnstillingar' sheetinu er hægt að láta tölvuna raða handahófskennt í styrkleika með því að smella á „Handahófskenndur styrkleiki“.
• Það koma alltaf sömu úrslit á leikjum eða þangað til smellt er á „Núllstilla mót“ eða styrkleikar liðs breytast. Ekki er mælt með því að breyta styrkleika liðs eftir að mót hefst.

Látið vita í athugasemdum excel.is ef eitthvað er óskýrt eða má betur fara.

Enska úrvalsdeildin í Excel skjali

Þar sem enska úrvalsdeildin í fótbolta byrjaði í dag útbjó ég smá Excelskjal sem hjálpar til við að fylgjast með stöðunni í deildinni hér.

Annars var ég að fatta hvernig ég get horft á video í símanum mínum. Þannig að ef ég er ekki að horfa á video í tölvunni, þætti í sjónvarpinu eða kvikmyndir í bíói, þá er ég að því í símanum.

Ég vildi að ég hefði aldrei keypt þennan andskotans síma.

Excel færsla

Eftirfarandi Excel tengd atvik hafa átt sér stað síðustu daga og nætur:

1. Excel endalok
Í gær tókst mér að gera svo flókið Excel skjal að, þó það virki fullkomlega þangað til ég loka því, þá neitar Excel að opna það eftir að ég loka því, af því það skilur það ekki alveg.

Það eru til ca fimm leitarniðurstöður á Google að þessari villu, engin þeirra skilar niðurstöðu. Ég hef því unnið þennan Excel tölvuleik. Endakallinn olli vonbrigðum.

2. Tímaferðalag
Í gærnótt dreymdi mig að ég hefði farið aftur í tímann um ca 22-23 ár og hitt sjálfan mig, þar sem ég var að leika mér að skrifa í stærðfræðistílabókina mína tölur og keppnir ýmiskonar.

Ég sagði sjálfum mér frá Excel og að ég yrði að vinna í því alla daga við að slá inn tölur og annað, þegar ég yrði eldri. Ég hef sjaldan séð jafn hamingjusamt barn. Þá vaknaði ég og þurfti að fara í helvítis vinnuna.

3. Magic 8-ball
Ég var ekki viss hvort ég ætti að gera Excel skjal sem virkaði alveg eins og Magic 8-ball, þeas maður spyr já eða nei spurninga og skjalið myndi svara og þannig hjálpa við að taka ákvarðanir.

Svo ég gerði Magic 8-ball skjal og spurði það. Sem betur fer sagði það já. Náið í skjalið hér.

Ræktarferðir helgarinnar part 1

Í gær var uppáhalds ræktardagurinn minn á árinu en þá voru úrslitin úr Eurovision sýnd á RÚV. Ég tók því „Finnur var einn í heiminum“ ræktardag, þar sem ég var 10% allra gesta ræktarinnar. Ekki af því ég er svona margur, heldur vegna þess að ræktin var blessunarlega nánast laus við mannfólk.

Eftir rækt fór ég í bíó með Sibba (á myndina Paul, sem er fín. 6/10 eða 2,5/4) og svo heim í Excel, þar sem var grunsamlega fámennt.

Ég hef áður gert graf um það hvenær best sé að fara í ræktina út frá tíma dags. Hér er graf yfir hvenær er best að fara í ræktina út frá tíma árs:

Smelltu á mynd fyrir stærra eintak í nýjum glugga.

Best væri auðvitað að fara þegar er fámenni, þar sem fólk er ógeðslegt fjölmenni, því þá er ég ekki í ræktinni.

Punktablogg

* Ég hef búið til nýja síðu. Í þetta sinn hálfgert nafnspjald á netinu um mig og mínar síður. Hana má sjá hér.

* Ég hef útbúið nýtt Excel skjal yfir Pepsi deildina í fótbolta, sem byrjar á morgun 1. maí. Skjalið má finna á excel.is eða hér.

* Ég held áfram að setja inn myndir af Valeríu Dögg, bróðurdóttur minni, í þættinum "Barnið þitt er forljótt miðað við frændsystkini mín".

Ekkert persónulegt.

Aðsóknin á Excel.is

Í vikunni tilkynnti ég opnun á nýrri síðu, Excel.is, sem ég og kunningi minn höldum úti. Rétt í þessu voru fyrstu aðsóknartölur að koma í hús.

Þær eru nokkuð góðar miðað við Íslenskar síður en þó talsverð vonbrigði, þar sem okkar aðal samkeppnisvefur er enn með forskot.

Smelltu á "Lesa meira" fyrir graf sem sýnir hvernig leikar standa á netinu.

Excel.is og önnur ævintýri

Ég átti bæði mína gleðilegustu og sorglegustu stund ævi minnar um þessa helgi.

Gleðilegasta stundin var í dag þegar ég loksins opnaði síðuna excel.is með kunningja mínum. Á síðuna munum við setja leiðbeiningar fyrir þetta yndislega forrit sem Excel er, ásamt allskonar gagnlegum skjölum. Endilega komið með hugmyndir að skjölum eða fyrirspurnir á excel@excel.is.

Sorglegasta stundin átti sér stað í gær í Bónus þegar ég reyndi að ganga í augun á sætri stelpu með því að lesa utan á Chicago Town örbylgjupizzu umbúðum, eins og ég hefði aldrei séð þessa gerð matar áður og væri til að prófa hana einu sinni, þegar ég borða þetta í raun í annað hvert mál. Ég sá ekki betur en að þetta virkaði á hana því hún hljóp ekki í burtu öskrandi. Ég notaði því tækifærið og fór heim án þess að yrða á hana.

Auknar vinsældir mínar

Ég hef löngum hreykt mér af því að fá símtöl annað slagið. Í lok mars mánaðar, eins og núna, gapi ég svo yfir vinsældum mínum (sem mældar eru í fjölda símtala frá vinum), aðeins til að verða fyrir vonbrigðum með restina af árinu.

Svo fer ég að hugsa. Þetta var ekki svona áður en ég vann á skattstofu Austurlands (2001-2006 ca.) við yfirferð skattaframtala.

Svona var þetta þá:

Eftir að ég byrjaði (og hætti) á skattstofunni hefur jafnvægi símtala eftir mánuðum raskast talsvert. Það tengist mögulega því að skattaframtölin eru send út í febrúar og skilafresturinn er í lok mars.

Það sem ég er að reyna að segja: Loðnutímabili mínu í vinamálum fer að ljúka og við taka störukeppnir við símann og sleikir við Excel langt fram eftir nóttu.

Ég kvarta ekki, ég hef hreina unun af því að hjálpi fólki í neyð með framtölin, þó ég sé bara giskandi út í loftið. Jafnvel sérstaklega þá.

Vinnan mín

Ég er aldrei spurður hvað ég geri "eiginlega" í vinnunni og af hverju.

Ég hef alltaf svarað því með þögninni og léttri en óhugnalegri störu, þangað til í dag. Það er löngu kominn tími til að svara þessari óspurðu spurningu, í myndaformi.

Hér er yfirlit yfir það sem ég geri í vinnunni, en einhverra hluta vegna heldur Outlook forritið utan um það:

Hver grænn kubbur á myndinni táknar Excel skjal sem ég hef unnið og sent út til samstarfsfólks míns.

Stutt svar: Án Excel væri ég sennilega bæjarfíflið.

Excel skjal fyrir Iceland Express deildina

Svona líður mér innanbrjósts.

Nýlega byrjaði Iceland Express deild karla í körfubolta á ný. Mér fannst því við hæfi að gera Excel skjal þar sem einungis þarf að slá inn úrslit leikja til að sjá töflu yfir unna og tapaða leiki ásamt heildar- og meðalstigafjölda í leik. Ennfremur má finna í skjalinu töflu yfir aðeins leikna heima- og útileiki.

Það er betra að taka fram að skjalið er unnið í Excel 2003. Því er möguleiki á að litirnir séu ekki tilvaldir.

Skjalið fyrir tímabilið 2010-2011 í Iceland Express deild karla í körfubolta er að finna hér.

Bónus:
UMFÁ, mitt gamla körfuboltafélag, hóf leik á ný í 2. deildinni. Ég útbjó því skjal fyrir 2. deildina líka.

Skjalið fyrir tímabilið 2010-2011 í 2.deild karla í körfubolta er að finna hér.

Ég minni á Excelsíðuna, hafi fólk áhuga á einhverjum sérstökum skjölum. Einnig má hafa samband við mig í netfanginu finnurtg@gmail.com með fyrirspurnir eða beiðnir. Ekkert skjal er of lítið eða stórt.

Svefnlausar hugsanir

Síðastliðna nótt lærði ég að ef sofið er frá 19:00 til miðnættis, má búast við að sofa ekkert þar til mætt er í vinnuna morguninn eftir. Þetta lærði ég verklega.

Á meðan ég lá og reyndi að sofna í nótt, fór ég að hugsa um American Style og hversu mikið ég væri til í að fá mér kjúklingabringu hjá þeim fljótlega. Þaðan barst hugsunin til salatsins sem American Style ber fram með kjúklingabringunum og hvernig það er uppbyggt. Og þá fæddist þetta:

Takið eftir litavalinu. Fagmannlegt.

Það eina sem ég borða ekki af þessu er kál. Restin er stórbrotin.

Mæli annars með American Style. Þægileg stemning, góð og hröð þjónusta og góður matur. Fyrir utan salatið.

Nafnavél

Ókeypis sýnishorn úr Nafnavélinni™.

Svo gaman hef ég af því þegar fólk velur öðruvísi, hipp og nýmóðins nöfn á afkvæmin sín, að ég hrópa oftar en ekki úr hlátri.

Það gerist bara svo sjaldan (og ég er byrjaður að fá samviskubit yfir óförum barnanna) að ég neyddist til að gera Excel skjal í dag sem býr til random lögleg, Íslensk stráka- og stelpunöfn.

Skjalið gefur kost á því að gera stráka- eða stelpunöfn og leyfir eitt, tvö eða þrjú nöfn. Nöfnin eru fengin af lista yfir Íslensk mannanöfn á Wikipedia.

Ég mæli með skjalinu fyrir nýbakaða foreldra sem vantar öðruvísi nafn eða fólk sem vill fá sér nýtt krúttnafn.

Skjalið má nálgast hér og nefnist það Nafnavél.

Vinsamlegast látið vita í athugasemdum eða með pósti á finnurtg@gmail.com ef skjalið virkar ekki á einhvern hátt.

Ræktartölfræði

Það tíðkast víða á netinu að taka fram virkni sína í ræktinni. Ég vil ekki vera útundan. Hér er mín tölfræði úr ræktarferð minni á miðvikudaginn, sælla minninga:

Ég hljóp rúmlega 718 þúsund sentimetra á aðeins 0,0347 dögum, sem gerir tæplega 1,5 milljarða mm/viku meðalhraða eða 0,002393 kílómetra á sekúndu.

Á meðan á þessu stóð svitnaði ég á meðalhraðanum 7.889 lítrar á ári.

Þessi mynd ætti að útskýra betur árangurinn:

Það vantar talsvert upp á úthald mitt.

Ég svitna þó ekki svo mikið.

Mitt helsta vandamál

Líf mitt í hnotskurn [smelltu á mynd fyrir stærra eintak í nýjum glugga]

Þessi skilaboð komu þegar ég reyndi að hætta í vinnunni í dag. Tölvan þekkir mig of vel.

[Viðbót: Breytti "talvan" í "tölvan" eftir vinalega ábendingu í formi hlekks á mynd]