Hversdagsleg ævintýri

Nokkur ævintýri úr hversdagslegu lífi mínu:

1. Teygja um úlnlið
Ég geng með teygju um hægri úlnlið af gömlum vana og til að hafa eitthvað í mínu munúðarfulla og alltof óklippta hári þegar ég hleyp í ræktinni eða spila körfubolta. Einn morgunn í vikunni hafði teygjan færst yfir á vinstri úlnlið og kona í vinnunni, sem við skulum kalla Hróðný, tók eftir því.

Hróðný: Ertu hættur að ganga með teyju um úlnliðinn eftir samtal okkar um daginn?
Ég: Nei alls ekki. Ég er meira að segja farinn að búa þær til heima eftir Kínverskri aðferð.
Hróðný: Hahahahaha, góður.

Það er skemmst að segja að mér sárnaði að hún héldi að ég væri ekki nógu handlaginn til að gera það og ákvað að gefa henni ljótasta nafn sem ég gæti hugsað í bloggfærslu.

2. Nýtt rúm
Ég keypti mér nýtt rúm í nýliðinni viku. Þetta er annað rúmið sem ég kaupi fyrir meira en 100.000 krónur á sex árum. Ástæðan er þríþætt.

Í fyrsta lagi er mjög erfitt að gera mér til geðs þegar kemur að rúmum. Og það er erfitt að skila rúmum ef mér líst illa á þau eftir ákveðinn tíma. Svo ég gef það og kaupi mér nýtt.

Í öðru lagi er mér frekar illa við peninga og vil helst ekki hafa þá tengda við nafn mitt.

Og í þriðja lagi þarf ég að viðhalda orðspori viðskiptafræðingsins sem ég er og læt því sjá mig reglulega í rúmverslunum svo fólk geti sagt sín á milli "Aha, þarna er Finnur Viðskiptafræðingur. Ég sé að hann hefur það nógu gott til að vera að leita sér að nýju rúmi, enda viðskiptafræðingur."

3. Kína
Fyrir rúmri viku sá kona í vinnunni, sem við skulum kalla Hróðný, að ég geng með teygju um úlnliðinn og spurði hvort hún mætti fá hana lánaða. Ég samþykkti það. Þegar hún skilaði henni svo síðar sagði hún mér að hárteygjur væru yfirleitt gerðar í Kína úr notuðum smokkum. Við hlógum að þessum fróðleiksmola, þó undir niðri væri að vakna hjá mér viðskiptahugmynd.

Eitt leiðir að öðru

Í dag (og á morgun) er ég í fríi vegna þess að ég á allt sumarfríið mitt eftir frá í fyrra og þarf að klára það fyrir 1. maí næstkomandi.

Ég vaknaði upp úr hádegi og þurfti að pissa. Svo ég fór á klósetið.
Úr því ég var komin á fætur gat ég alveg eins klætt mig og tannburstað.
Úr því ég var kominn í föt gat ég alveg eins farið út.
Úr því ég var kominn út gat ég alveg eins keypt mér nýtt rúm.
Úr því ég var búinn að kaupa mér nýtt rúm gat ég alveg eins farið heim.
Úr því ég var kominn heim gat ég alveg eins lagt mig.
Úr því ég var sofnaður gat ég allt eins byrjað að dreyma.
Úr því mig var farið að dreyma gat ég alveg eins dreymt að leikarinn William Fichtner segði að ég væri í ljótum gallabuxum, svo ég sagði að hann er með ljótt hár en tók það til baka þegar ég sá hvað honum sárnaði.

Fínn dagur.

Afturendi við andlit lögmálið (AVAL)

Ég hef loks fullklárað kenningu um nýtt lögmál sem ég hef unnið að í sturtuklefa ræktarinnar síðustu átta ár. Lögmálið er náskyld Lögmáli Murphy's sem hljómar svo (tekið af íslensku Wikipedia síðunni um LM):

Lögmál Murphys er mjög almennt lögmál sem segir að ef að nokkur möguleiki sé til staðar á því að eitthvað fari illa, þá muni það fara illa

Lögmálið mitt er mun nákvæmara:

Ef þú velur þér skáp í World Class Laugum á háannatíma við hliðina á öðrum skápi í notkun, mun andlit þitt lenda í metra fjarlægð frá kviknöktum afturenda, á næstu fimm mínútum, hvort sem þér líkar það betur eða verr.

Hér eru valdarnir að þessari kenningu:

1. Alltaf þegar ég notast við skáp við hliðina á öðrum skáp í notkun kemur viðkomandi notandi á meðan ég er að klæða mig í íþróttafötin og beygir sig og teygir við hliðina á mér. Sértu á milli tveggja skápa í notkun munu tveir naktir aðilar koma á meðan þú klæðir þig. Þeir eru aldrei að flýta sér í föt.

2. Enginn virðist vera með ca 500 metra radíus í personal space (ísl.: einkapláss) lágmark eins og ég sem hækkar upp í 2,5 km radíus þegar nekt á í hlut.

3. Enginn virðist hafa tíma til að hugsa út í svona tilgangslausa og óþarfa hluti eins og ég.

Þitt og hetta

1. Áfengissýki
Í morgun lauk ég við mína fyrstu flösku af dönskum brjóstdropum, sem ég keypti fyrir sex vikum og hef drukkið eins og stjórnlaus alkóhólisti kvölds og morgna til að losna við, að því er virðist, krónískt kvef. Ekki nóg með að þetta áfengisævintýri mitt hafi rústað á mér bragðlaukunum svo illa að ég borðaði Risa Hraun með hálfum hug í morgun (og í hádeginu og kvöldmat), heldur fékk ég áfengistremma og verk í lifrina þegar ég fékk ekki skammtinn minn af dropunum í kvöld. Á móti kemur að ég hef náð að minnka horrennsli um 3%. Vel þess virði.

2. Nafn á nýjan frænda
Kolla systir og Árni Már, spúsi hennar, skírðu son sinn í dag og varð nafnið Valmundur Pétur fyrir valinu, sem gerir barnið að alnafna afa síns. Ég mætti ekki í skírnina, sem fram fór á Akureyri, vegna ólæknandi kvefs (sjá að ofan) og vegna fregna um að ekkert Risa hraun yrði á boðstólnum í veislunni. Ég lofa að taka mér frí einhverntíman fljótlega og bæta þeim þetta upp.

3. Samtal við Valeríu Dögg
Nýlega passaði ég Valeríu Dögg, rúmlega 2ja ára bróðurdóttir mína þegar við heyrðum í flugeldum. Þar sem hún er mikill aðdáandi flugelda hoppuðum við út í glugga, þar sem við hvorki sáum né heyrðum í flugeldum:

Ég: Eigum við að prófa að kalla á flugeldana? Athuga hvort þeir komi ekki?
Valería: Já!
Ég: Flugeldar! Hvar eruði?
Valería með mjög skrækri röddu, að þykjast vera flugeldur: Við erum hérna.
Ég: Ætliði ekki að koma að springa?
Valería: Jú, við erum alveg að koma.
Ég: Hvað eruði að gera?
Valería: Bara... að vaska upp.

Ég held ég hafi aldrei hlegið jafn mikið að einhverju sem barn hefur sagt, hvað þá rúmlega 2ja ára gamalt barn.

Ónæmiskerfið ónýtt

Í gærkvöldi veiktist ég í fjórða sinn á þremur mánuðum af kvefi eða einhverju í þeim dúr. Þetta kvef lýsir sér í raddleysi, hósta og helling af sjálfsvorkunn.

Í kvöld dundaði ég mér því við að fjarlægja úr mér ónæmiskerfið, sem virðist vera ónýtt hvort eð er, með teskeið og skærum. Sá sem er fyrstur til að hafa samband fær það gefins gegn því að viðkomandi skaffi meðalstóran poka undir það og/eða geti reddað mér blöðru til að búa í.

Heilastormun

Í nótt vakti ég til klukkan 3 til að finna leiðir til að hætta að fara alltaf of seint að sofa. Ég fann enga leið.

Í dag slefa ég úr þreytu. Ég gefst ekki upp og reyni aftur í nótt.

Kvikmyndahlass

Hér er nýjasta hlass af myndum sem ég hef séð í bíóhúsum:

Cloud Atlas (Ísl.: Óbærilegur léttleiki tilverunnar)
Fjallar um ca 250 mismunandi hluti og karaktera sem allir tengjast á einn eða annan hátt. Sömu leikararnir bregða sér í hlutverk allskonar persóna í gegnum myndina, sem er ein helsta skemmtunin við myndina. Hún er mjög vel gerð en söguþráðurinn full epískur fyrir minn smekk.
Tvær og hálf stjarna af fjórum.

The Impossible (Ísl.: Hið ólíklega)
Hjón með þrjá stráka lenda í miðri flóðbylgju á Indlandi jólin 2004 og upphefst leit að hvoru öðru. Myndin er auðvitað byggð á sönnum atburðum. Svo virðist sem Ewan McGregor geti ekki staðið sig illa eða leikið í slæmum myndum. Myndin er stórbrotin, áhugaverð og býsna ógeðsleg á köflum eða góð afþreying, eins og ég kýs að kalla hana.
Þrjár stjörnur af fjórum.

Django Unchained (Ísl.: Ókeðjaði blámaðurinn)
Quentin Tarantino tekur fyrir ævintýri Django, sem byrjar myndina sem þræll í Bandaríkjunum á gullöld þeirra. Tannlæknir kaupir hann og þiggur aðstoð frá honum við að finna skúrka. Upphefst samstarf og pínu platónísk ástarsamband (Ens.: Bromance).
Það er ekki oft sem jafn skemmtilegar og vel gerðar myndir koma í bíó. Myndin hefur allt: Réttlæti, snargeðveikt ofbeldi, ótakmarkaða fegurð og góðan leik.
Fjórar stjörnur af fjórum.

Memento og Griðastaður

Í dag átti ég Memento upplifun* í vinnunni þegar ég fór inn á salerni hæðarinnar að sækja pappírsþurrkur, þar sem ég var að borða hádegismatinn við silkimjúka birtu frá Excel á tölvuskjánum.

Þegar ég kom inn á salernið stoppaði ég og sagði "Hmm... ég þarf ekki á klósetið. Hvað er ég að gera hérna?"

Eftir nokkrar sekúndur ákvað ég að þvo mér vel um hendurnar og fara aftur að vinna.

Þegar ég kom svo til baka og mundi hvað ég ætlaði að gera, risti skipunina á handarbakið á mér með ryðguðum nagla sem ég fann og sótti þurrkur.

Annars er það að frétta að í gær sá ég myndina La Clé des Champs (Ísl.: Griðastaður) á frönsku kvikmyndahátíðinni í Háskólabíó. Myndin fjallar um dreng sem gengur í kringum tjörn og fylgist með (skor)dýraríkinu. Einhver furðulegasta afsökun fyrir bíómynd sem ég hef séð. Spoiler: Hann gefur stelpunni stækkunargler og hún fer úr bænum.

Sérfræðingar (ég í fleirtölu) telja myndina einn af lágpunktum kvikmyndasögunnar.

Hálf stjarna af fjórum. Hálfa stjarnan er fyrir Sylvester Stallone í feluhlutverki sem bóndi á hjóli í bakgrunni.

*Memento fjallar um mann sem hefur ekkert langtímaminni. Sjá dæmi hér.

Vanity fair viðtal

Nýlega rakst ég á þennan spurningalista sem grínistinn Louis CK var beðinn um að fylla út. Af hverju hann? Er hann merkilegri en ég?

Svar: Já. En ég ætla samt að svara listanum líka. Aðallega þó vegna þess að ég er veikur, enn eina ferðina og hef ekkert að skrifa um.

Hver er þín hugmynd að fullkominni hamingju?
Að lesa frétt um að tölvan sem geymir upplýsingarnar um stúdentalán mín hafi dottið niður stiga og hálsbrotnað.

Hvað er þinn mesti ótti?
Að missa einhvern nákominn og að bíllinn minn bili.

Hvaða lifandi manneskju dáirðu mest?
Enga sérstaka. Ef ég yrði að velja myndi ég segja Barbapabbi og Barbamamma. Að vera foreldrar svona margra krakka án þess að missa vitið er örugglega erfitt.

Hvaða eiginleika þinn fyrirlíturðu mest?
Ég naga neglur. En þó bara mínar neglur. Ennþá.

Hvað finnst þér ofmetnastasta dyggðin?
Ákveðni. Af því ég er það ekki.

Hvað líkar þér verst við útlit þitt?
Gleraugun mín. Og sokkarnir sem ég er í passa illa við leðursamfestinginn sem ég er í.

Hvað eða hver er ást lífs þíns?
Microsoft Excel 2010.

Hvenær og hvar varstu hamingjusamastur?
Ég man ekki hvenær það var en ég lá örugglega í grasi.

Hvaða hæfileika værirðu mest til í að búa yfir?
Óraunhæfur: Að þurfa ekki að sofa. En geta það samt.
Raunhæfur: Að vera mjög góður í að drekka kaffi. Í dag kann ég það ekki.

Í hvernig skapi ertu?
Ég er yfirleitt í sama skapinu. Sem er nokkuð gott skap.

Ef þú gætir breytt einhverju einu við þig, hvað yrði það?
Meiri metnað í fatavali.

Ef þú gætir breytt einu við fjölskyldu þína, hvað yrði það?
Að hún byggi nær mér.

Hvað telurðu vera þitt mesta afrek?
Fyrir utan að hafa verið í öðru sæti í bringusundi í mínum riðli á fámennu sundmóti í Bjarnarfirði 1989? Sennilega að ég gaf út bók fyrir nokkrum árum.

Ef þú gætir valið hvað þú kæmir aftur sem, hvað yrði fyrir valinu?
Hundur. Þeir eru yfirleitt frekar hressir.

Hvað telurðu vera þína lægstu stund eymdar?
Þegar ég vaknaði nær dauða en lífi eftir áfengisdauða á miðjum Vilhjálmsvelli á Egilsstöðum eftir, að ég held, dansiball.

Hvaða eiginleika líkar þér best við í karlmönnum?
Hlédrægni.

Hvaða eiginleika líkar þér best við í konum?
Hlédrægni.

Hvað kanntu mest að meta í fari vina þinna?
Liðleiki (í samskiptum!).

Hverjir eru þínir uppáhalds rithöfundar?
Ég á mér enga.

Hver er þín uppáhalds hetja í skáldsögum?
Dexter Morgan.

Hverjar eru hetjur þínar í raunveruleikanum?
He-Man auðvitað.

Hvað mislíkar þér mest?
Tillitsleysi og tilætlunarsemi. Og hundaskítur.

Hvernig myndirðu vilja deyja?
Hver segir að mig langi að deyja? Ok fínt. Í svefni, takk.

Hvert er slagorð/mottó þitt?
„Nei, takk.“

Kvikmyndir ársins 2012

Hér er topp 8 listi minn yfir þær kvikmyndir sem ég sá á nýliðnu ári. Ath. einhverjar þeirra eru mögulega ekki frá árinu 2012. En ég sá þær amk á árinu. Og það er það eina sem skiptir máli.

1. Skyfall (Ísl: Saurbær)
James Bond klikkar ekki með Daniel Craig í hlutverkinu. Hvergi nærri jafn góð og Casino Royal og aðeins betri en Quantum of Solace.
3,5 stjörnur af fjórum.

2. Looper (Ísl: Lárus Lykkjari fer á kostum)
Vísindaskáldsaga með Joseph Gordon-Levitt í hlutverki Bruce Willis í hlutverki leigumorðingja í framtíðinni og lengra í framtíðinni (Lalli Lykkjari), sem keppist við að drepa sjálfan sig áður en hann drepur sjálfan sig.
3,5 stjörnur af fjórum.

3. Dredd (Ísl: Dómari Davíð)
Ein óvæntasta mynd ársins. Og það í 3D sem ég hata meira en fólk sem ekki gefur stefnuljós. Davíð dómari læsist inni í risablokk og þarf að taka á honum stóra sínum til að halda sér á lífi. Sérstaklega skemmtilegt túlkun á Davíð Dómara, sem bókstaflega skelfur úr hatri.
3,5 stjörnur af fjórum.

4. The Dark Knight Rises (Ísl: Maður klæddur sem leðurblaka rís)
Þriðja og síðasta myndin um manninn sem er klæddur eins og leðurblaka. Ein af verstu myndum leikstjórans, sem segir ekkert þar sem hann gerir bara góðar myndir.
3,5 stjörnur af fjórum.

5. The Girl with the Dragon Tattoo (Ísl.: Barnaby ræður gátuna)
Hollywood útgáfan. Svipað góð og upphaflega útgáfan. Talsvert dekkri. Fjallar um karlmenn sem hata konur og Lisbeth Salander.
3,5 stjörnur af fjórum.

6. 21 jump street (Ísl.: Bankastræti 21)
Ólíklegt lögguvinapar fer í gervi menntaskólanema til að leita að dópi eða einhverju. Mun fyndnari mynd en ég bjóst við.
Þrjár stjörnur af fjórum.

7. Chronicle (Ísl.: Sér grefur gröf).
Unglingar fá ofurhæfileikann til að færa hluti úr stað með hugarorkunni. Upphefst mikið ævintýri. Áhugaverð og vel leikin mynd
Þrjár stjörnur af fjórum.

8. Contagion (Ísl.: Smit)
Raunsæ mynd um það hvað myndi gerast ef banvænn vírus kemst í umferð. Vel leikin og afar áhugaverð mynd.
Þrjár stjörnur af fjórum.

Heiðurssæti: ∞. Killer Joe (Ísl.: Jói vondi kall)
Eitthvað það allra ömurlegasta sem ég hef látið innfyrir augu mín. Tilgerðarleg, ofleikin og afspyrnu heimskuleg.
Hálf stjarna af fjórum.

Áramótaheiti 2013

Eitt af ca 25 áramótaheitum mínum þetta árið er að skrifa oftar á þessa síðu. Áramótaheiti mitt í fyrra var að strengja áramótaheiti þetta ár um að blogga oftar, svo ég náði að uppfylla það rétt í tæka tíð áður en árinu lauk.

Hér eru sex stærstu áramótaheitin þetta árið:

1. Að koma íbúðinni sem ég bý í í gestvænlegt horf.
Til dæmis að kaupa mér nýtt rúm, setja upp myndir, lýsa stofuna betur upp og jafnvel brjóta saman eins og ein föt saman og setja í skáp, helst fleiri.
Líkur: 95%.

2. Borða hollara.
Reyna að drekka ekki gos með hverri máltíð og borða Risahraun í hvern eftirrétt. Hljómar auðvelt. En er það ekki. Sérstaklega ekki í miðjum nammitremma.
Líkur: 1,3%.

3. Fara á amk eitt fyllerí á árinu.
Í fyrra drakk ég samtals einn bjór. Ég vil gjarnan auka áfengisneysluna um amk 10.000%.
Líkur: 35%.

4. Sofa minna á daginn og meira á nóttunni.
Ég nálgast óðfluga að sofa lengur á daginn við að leggja mig en við nætursvefn fyrir vinnu. Það verður að breytast áður en illa fer.
Líkur: 50%.

5. Skrifa meira.
Ég hef aldrei verið minna virkur í skrifum en á síðasta ári. Ég þarf að snúa þessari þróun við. Jafnvel gera eitthvað nýtt í þeim efnum.
Líkur: 75%.

6. Losa mig við Peugeot draslið mitt áður en hann gerir mig gjaldþrota.
Þetta hef ég sagt í næstum 7 ár.
Líkur: 0,37%

Jólafrí 2012

Ég er kominn aftur til Reykjavíkur (Kópavogs nánar tiltekið) eftir tveggja vikna jólafrísdvöl á Egilsstöðum (í Fellabæ nánar tiltekið), sem útskýrir aðeins að hluta til áður óþekkta leti mína við skrif á þessa síðu.

Í jólafríinu tók ég upp á allskonar nýungum, sem hingað til hefði ég aldrei látið mér detta í hug að gera, eins og:

• Að horfa á Mamma Mia, dansandi og syngjandi með.
• Að dansa um í fáránlegri samsetningu fata með hárspennu í hárinu, án nokkurrar tónlistar.
• Flýja undan risaeðlum, krókódílum og Mikka Ref sem ætluðu að kítla mig.
• Láta inniskónna mína tala, eins og þeir væru kettir.
• Syngja hástöfum allskonar lög, án undirspils og í kringum allskonar fólk, án þess að skammast mín fyrir afskaplega takmarkaða sönghæfileika.

Hver er ástæðan? Hér eru nokkrir möguleikar:

1. Ég hef hafið eiturlyfjaneyslu og það gengur nokkuð vel.
2. Ég missti vitið á því að vera bílveikur á leiðinni austur.
3. Ég var að uppfylla áramótaheiti frá árinu áður.
4. Ég er orðinn það ríkur að mér er sama um álit annarra og geri það sem ég vil, þegar ég vil.
5. Ég var að leika við Valeríu Dögg, rúmlega 2ja ára bróðurdóttir mína.

Rétt svar: 5. Og smá 1.