Núll

Í gær fór ég til tannlæknis. Þegar ég steig úr stólnum sá ég smáskilaboð frá bankanum mínum, sem tilkynnti mér að ég hafði fengið 15.000 krónur greiddar inn á reikninginn minn fyrir aukavinnu sem ég tók að mér. Ég var við það að missa stjórnina á brosvöðvum þegar afgreiðslukona tannlæknastofunnar rétti fram reikninginn fyrir tannlæknatímann: 15.060 krónur.

Í um 30 sekúndur átti ég 15.000 krónur inn á bankareikningnum mínum sem voru ólofaðar. Ég mun alltaf muna þann tíma og ilja mér við tilhugsunina.

Draumfarir

Í nótt dreymdi mig að ég væri kartafla. Ég átti son sem var líka kartafla. Í draumnum hafði ég miklar áhyggjur af því að finna maka fyrir son minn, svo hann gæti eignast sinar eigin kartöflur.

Kapteinn Rútína

Ég hef alltaf haldið því fram að ég sé einhver minnst spennandi karakter alheimsins. Ég elska rútínu, að leggja mig (í að lágmarki tvo tíma) og mesta spenna sem ég upplifi er þegar ég fer í bíó.

Í vikunni sem leið átti þetta samtal sér stað eftir tveggja tíma lúr eftir vinnu:

Gabriela (kærastan): Dreymdi þig eitthvað?
Ég: Já, mig dreymdi ég væri að vinna og að þú sendir mér skilaboð um að þú værir fyrir utan á bílnum. Ég svaraði að ég væri á leiðinni, stimplaði mig út og fór út í bíl.
Gabriela: Þig dreymdi semsagt nákvæmlega það sem gerðist þegar ég sótti þig í vinnuna áðan?
Ég: Já.

Þegar ég fór svo að sofa síðar um kvöldið dreymdi mig að ég væri að velja nokkra dálka í Excel skjali til að afrita og setja í nýtt skjal.

Bílafréttir

Leikur
Það er komið að hinum reglulega þætti síðunnar "Hvað í fjandanum datt undan bílnum mínum?", sem ég hef haldið úti á Instagram undanfarið.

Í þætti númer sjötíu er það þessi hlutur, sem í fljótu bragði virðist ekki hafa áhrif á gang bílsins:

Vísbending: Þetta minnkaði virði bílsins um 10% eða 127 krónur.

Sigurvegari fær forkaupsréttindi á þessum bíl, með eða án þessa aukabúnaðar, hvort sem honum líkar betur eða verr.

Svarið í þætti 69 var: Pústið í heild sinni.

Bensíntaka
Í kvöld tók ég bensín hjá Atlantsolíu án allrar afsláttar. Ég beið eins og ég gat eftir tilboðsdegi, þegar fyrirtækið auglýsir 10-15 króna aukaafslátt af lítranum, en tók bugaðist þegar bensínnálin vísaði nánast beint niður.

Þetta þýðir bara eitt: Á morgun verður 10-15 króna afsláttur á bensínlítranum hjá Atlantsolíu. Og ég verð gnístandi tönnum í vinnunni þegar ég sé auglýsinguna.

Vetrarhörkur
Ég braut enn eina rúðusköfuna í vikunni. Í kjölfarið hóf ég leit að nýrri og betri rúðusköfu. Hún skal vera sterkbyggð, endingargóð og má ekki kosta undir 500.000 krónur. Mér finnst sjálfsagt að eyða góðri upphæð í eitthvað sem við íslendingar eyðum þriðjungi ævi okkar í.

Ef einhver veit um slíka rúðusköfu, láttu mig vita með því að skafa upplýsingarnar á rúðuna á bílnum mínum í skjóli nætur.

Hættur leynast víða

Á morgnana geng ég framhjá stóru útivistarsvæði grunnskóla til að komast í vinnu. Í morgun voru nokkrir 6-7 ára krakkar að hnoða snjóbolta þegar ég gekk framhjá.

Krakki: Hey! Þú! Megum við kasta í þig? Þú mátt kasta í okkur.
Ég: Nei, ekki núna.
Krakki: Allt í lagi. Láttu okkur vita ef þú vilt það.
Ég: Já, takk fyrir að spyrja.

Ég hringdi skömmu síðar í lögregluna og tilkynnti einbeittan brotavilja hjá viðkomandi gengi. Mikið væri gaman ef fólk gæti tekið þessa glæpamenn til fyrirmyndar.

Dressmann verðbólga

Dressmann, sú verslun sem hingað til hefur skaffað mér nærbuxur á góðu verði, hækkaði verðið svo mikið nýlega að ég get ekki með góðri samvisku keypt þær lengur.

Verðið á stökum nærbuxum hækkaði um 11%, sem er svosem ekki hræðilegt. Það sem er hræðilegt er að "kauptu þrjár, borgaðu fyrir tvær" tilboðið er ekki lengur til staðar. Þess í stað er viðskiptavinum boðið að kaupa þrjú pör á "aðeins 4.990 krónur".

Hér er tafla sem sýnir þetta betur:

Þarna sést að verðið á þremur nærbuxum fer úr 3.580 krónum yfir í 4.990 krónur, sem er 39% hækkun. Afslátturinn sem gefinn er af þremur í einu lækkar þannig úr 33% í 16%, um leið og verðið á stökum nærbuxum hækkar um 11%.

Ennfremur hefur allt verðlag í verslununum snarhækkað sýnist mér, en erfitt er að gera samanburð þar sem vörurnar breytast frá ári til árs.

Leitt, því ég hef verslað öll (undir)föt hjá Dressmann í mörg ár. Nú panta ég þau einhversstaðar ódýrara á netinu. Eða læt loks verða af því að gerast strípalingur.

Símastuldur í World Class Laugum

Fyrir um það bil tveimur vikum skrapp ég í ræktina (World Class Laugum) um miðjan dag. Á meðan á stjórnlausum lyftingum stóð var símanum mínum stolið úr fataskápnum.

Síminn er af tegundinni IPhone 5s. Ég átti enga mynd af honum svo hér er hann teiknaður eftir minni:

Ef þú hefur séð hann eða séð einhvern með einhvernveginn svona síma, láttu mig vita í finnurtg@gmail.com eða hringdu í lögregluna.

Ef þú stalst honum þá vinsamlegast skilaðu honum í afgreiðslu World Class Laugum. Ef þú vilt ekki skila honum, vinsamlegast fáðu krabbamein í eistun.

Viðbót: Lesendur hafa verið að kvarta undan ekki nógu góðri mynd af símanum. Fyrir þá vil ég benda á að hægt er að smella á myndina fyrir stærra einstak.

Samtal í matvöruverslun

Fyrr í kvöld fór ég í matvöruverslun og lenti fyrir aftan stúlku sem leit svona út:

Þegar kom að henni á kassanum tók við henni þessi afgreiðslustelpa:

Hún virtist ósátt við eitthvað. Þá tóku við þeirra samskipti.

Afgreiðslustelpan: "Var það eitthvað fleira?"
Viðskiptavinur: "Nei."
A: "Kannastu við ennið á mér?"
V: "Ha? Kannast ég við ennið á þér?"
A: "Já, þú ættir að gera það. Þú lamdir mig í ennið á [framhaldsskóli] ballinu um helgina!"
V: "Ó, varst það þú?"
A: "Já!"
V: "Ah ok. Hvað heitirðu?"
A: "[Nafn]!"
V: "Já ok. Ég var svo full að ég man ekkert."
A: "Já, þú komst af klósetinu og barðir mig!"
V: "Einmitt það já. Heyrðu talaðu við mig á Facebook eða eitthvað."

Ég, hugsandi: "Heimurinn þarf að vita af þessu samtali!"

Og nú gerir hann það.

ATH. Þetta eru ekki ljósmyndir af viðkomandi aðilum heldur túlkun undirritaðs á þeim.

Ljósmyndaannáll 2013

Á síðasta ári var ég óvenju skotglaður á símamyndavélinni minni. Það er því rökrétt að hafa smá ljósmyndaannál, þó myndirnar séu í hræðilegum gæðum.

Veðurannáll 2013

Ég er oft spurður þriggja spurninga:

1. Hvenær ætlarðu að blogga aftur?
2. Hvenær ætlarðu að skrifa um árið 2013, þar sem ýmislegt fróðlegt gerðist í þínu lífi?
3. Hvenær ætlarðu að hætta að vera svona sjálfhverfur?

af sjálfum mér. Svarið er: núna.

Úti er ævintýri

Í gærkvöldi fór ég út að labba í Laugardalnum, mér til heilsubótar en ekki til að versla fíkniefni. Að því loknu fór ég í verslunina Víðir og keypti mér nokkur kíló af ávöxtum. Mér fannst ég vera mjög heilbrigður og reyndi eftir bestu getu að brosa vinalega til annarra viðskiptavina og starfsmanna, en ekki óhugnarlega.

Það tókst ekki betur en svo að fólk leit undan og vildi helst ekkert með mig hafa. Ég skrifaði hjá mér að æfa brosið heima fyrir næstu verslunarferð.

Þegar ég kom heim sá ég að ég hafði fengið blóðnasir í göngutúrnum og blóðið storknað á efri vörinni, sem útskýrir viðmót allra sem mættu mér. Þá er ekkert annað að gera en að læra af þessari reynslu og hugsa sig tvisvar um áður en farið er út úr húsi hér eftir.

Afsláttur á Dominos pizzum

Pizzafyrirtækið Dominos er með útibú hérlendis. Á heimasíðu Dominos má sjá allskonar tilboð hjá þeim en hvergi er hægt að sjá raunverulegan afslátt. Ég varð forvitinn og ákvað að reikna hann út á öllum uppgefnum tilboðum.

Hér eru öll grunntilboðin sett saman í töflu:

Smellið á töfluna fyrir stærra eintak.

Tvennutilboðið er erfiðara að reikna út, þar sem tilboðið fer eftir stærð pizzu og fjölda áleggstegunda. Hér er tvennutilboðið í sér töflu:

Ég reiknaði með dýrustu gerðum af áleggjum í öllum tilvikum.

Ekkert grunsamlegt hérna. Mjög góður afsláttur af uppgefnu verði. Þá get ég sofið rótt.

ATH. Ég hef engin tengsl við Dominos önnur en þau að ég panta mér reglulega pizzu þaðan, þar sem ég kann ekki að elda og hef ekki heilabú í að læra það. Ennfremur er ég of latur til að leggja mig fram við að læra það. En nóg um mig.

Ráð viðskiptafræðingsins

Það er langt síðan ég hef gefið góð ráð varðandi allt mögulegt, hvort sem það tengist viðskiptum eður ei. En ég er viðskiptafræðingur, eins og, skiljanlega, oft hefur komið fram og því heitir þessi partur bloggsins þessu nafni. Þegiði og hlustið á góð ráð!

1. Bíllinn lyktar of vel.
Stundum lykta bílar of vel. Svo vel að fólk heldur að eigandi hans sé of góður með sig til að láta hann lykta illa. Það er auðvelt að breyta þessu. Að gleyma íþróttatösku með notuðum íþróttafötum í bílnum yfir nótt ætti að setja þig á sama stall og vinir þínir hvað lykt varðar. Ég reyndi þetta í nótt með góðum árangri.

2. Of mikill lífsvilji.
Oft er lífsviljinn of mikill hjá fólki, sem verður þá of hresst og mengar allt af ógeðslegri jákvæðni. Ég vil síður verða þannig, svo ég prófaði fyrir næstum tveimur vikum að hætta að borða nammi. Lífsviljinn snarféll og ég er nánast alltaf í vondu skapi í kjölfarið, öllum til mikillar gleði.
Ath. Aukaverkanir gætu orðið betri líkamleg heilsa, hreinni tennur og batnandi fjárhagsstaða.

3. Þig langar að herma (ens.: simulate) tímabilið 2013-2014 í öllum deildum enska fótboltans, eins oft og þú vilt og með möguleika á að breyta styrkleika og nöfnum liða. Helst í Excelskjali.
Þetta er grunsamlega mikil tilviljun: Um daginn setti ég þannig Excel skjal hér, inn á excel.is.

Notið þessi ráð varlega. Það er ekki allra að lifa lífi viðskiptafræðings.

Snapchat

Ég sá grein í Monitor tímariti Moggans nýlega sem bar heitið „Ert þú með Snapchat?“ og velti fyrir mér af hverju ég hafi aldrei verið spurður að þessu í tímaritum eða sjónvarpsfréttum. Svarið liggur í augum uppi og er svo einfalt að ég skil ekki að ég hafi ekki áttað mig á því fyrr: ég veit það ekki.

Allavega, ég hef ákveðið að svara umtalaðri fyrirsögn á þessari vefsíðu í mótmælaskyni.

Ert þú með Snapchat?
Nei.

Mörk mín

Síðan hrun Íslands hófst fyrir nokkrum árum hefur ýmislegt verið látið ganga yfir landann. Ég hef þó náð að halda ró minni.

Ég hélt t.d. ró minni yfir hækkandi verðlagi, jafnvel þó ég hafi fengið kauplækkun. Ég var sallarólegur yfir því að geta verið rekinn hvenær sem er vegna erfiðs árferðis fyrirtækja eða einhvers. Ég er meira að segja frekar rólegur yfir því að leiguverð er komið fram úr villtustu fantasíum fégráðugra Íslendinga (sennilega vegna þess að ég er að leigja á mjög sanngjörnu verði, ótrúlegt nokk).

En svo fór ég í mötuneytið og keypti mér tebollu. Svona leit hún út:

Þetta á að vera tebolla með helming hennar hulinn súkkulaði.

1. Hún var í mesta lagi með þriðjung hulinn.
2. Súkkulaðið var þunnt og illa setta á hana.
3. Undir bollunni var ekkert súkkulaði. Lesið þetta aftur til að átta ykkur betur á stöðunni. Ekkert súkkulaði undir!

Þarna dreg ég mörkin. Ég mæti í næstu mótmæli. Líklega þessi beri að ofan sem er að missa röddina af öskrum.

Ég á netinu

Þessar vikurnar hef ég haft um mikið að hugsa. Eða lítið. Hvort sem er betri afsökun fyrir fátíðum skrifum hérna.

Ég er þó ekki hættur. Ég lifi góðu lífi á öðrum síðum á netinu og er að vinna í að sameina þessa virkni alla á eina síðu, þessa. En þangað til, þeas ef það gerist einhverntíman, eru hér þær síður sem ég stunda reglulega:

Facebook
Hægt er að velja "follow" á reikningi mínum ef þú vilt fá uppfærslur frá mér, þeas ef þú þekkir mig ekki nægilega persónulega til að vera vinur.

Instagram
Myndasíða úr daglegu lífi mínu, sem er afskaplega óspennandi.

Twitter
Ég nota þetta lítið þessa stundina en stefni á að vera virkari í framtíðinni.

LinkedIN
Þetta er stafræna ferilskráin mín. Ekki mjög spennandi.

Pinterest
Hér pósta ég myndum sem ég finn á netinu og mér finnst mikið til koma. Engin nekt, enda bíð ég ekki syndinni í kaffi.

Spotify
Hér er tónlistin sem ég hlusta á.

Google+
Þetta nota ég ekkert. En það er aldrei að vita hvað gerist í framtíðinni.

About Me
Almennt um mig.

Excel.is
Skrif um Excel og aðstoð veitt með Excel tengd vandamál og ástarsorgir.

Við Rætur Hugans
Þetta blogg. Ef þið bætið þessu urli í rss lesara getiði fengið tilkynningu um nýjar færslur um leið og þær eru komnar á netið.

Bros

Á sunnudaginn gerði ég mér lítið fyrir og fór út að labba í Laugardalnum, þrátt fyrir að það hafi nánast verið maður við mann túristaástand þar.

Í upphafi göngutúrsins mætti ég stelpu á hjóli sem í fyrstu var alvarleg á svipinn en þegar hún leit til mín brosti hún eyrnanna á milli. Það er ekkert eðlilegt við það, svo ég fór að velta fyrir mér mögulegum ástæðum.

Ég hélt í fyrstu að ég væri með mjólkurskegg (eða kók- og/eða súkkulaðiskegg) og hóf að þrífa mig í framan, án þess að vera með spegil á mér. Þegar því var lokið læddist sá grunur að mér að hárið á mér væri eins og á Charles Manson á slæmum degi.

Þegar ég hafði greitt það með fingrum annarar handar ítrekað, kaldsvitnaði ég því ég var viss um að ég væri með opna buxnaklauf. Það reyndist ekki vera. Þá hélt ég að ég væri með eitthvað óhreint/ósmekklegt á peysunni sem ég var íklæddur. Það reyndist ekki vera.

Ég reyndi að spotta viðbrögð annarra sem ég gekk framhjá og sjá hvert þau horfðu þegar þau mættu mér. Ekkert kom úr þeirri rannsókn, nema að fólk er frekar hrætt við örvæntingarfullar augngotur.

Þegar hingað var komið við sögu var göngutúrnum nánast lokið og ég farinn að örvænta. Ég gekk því nokkuð hratt restina af leiðinni, í bílinn, beint heim og í sturtu áður en ég lagði mig, enn í nagandi óvissu.

Ef þú lest þetta, hjólastelpa: takk fyrir að eyðileggja göngutúrinn daginn fyrir mér, tillitslausa fíflið þitt.

Góður sunnudagur

Eftir að hafa horft á þetta myndbrot rétt eftir að ég vaknaði í gær, stökk ég á fætur og hélt því fram að dagurinn yrði góður.

Ég stökk af stað í innkaupaferð. Fyrsta stopp var Kostur, sem sérhæfir sig í amerískum vörum, þar sem ég ætlaði að kaupa mér mjólk en endaði á að kaupa mér eitt og hálft kíló af súkkulaði.

Ég lét ekki óheppilega byrjun hafa áhrif á áætlun mína heldur fór næst í Sports Direct íþróttavöruverslunina og keypti mér íþróttatreyju. Við kassann sagðist ég hafa góða tilfinningu fyrir þessum viðskiptum og afþakkaði því kvittunina.

Aldrei hef ég haft jafn rangt fyrir mér, því við að ganga út fór þjófavarnarkerfið af stað. Þar sem ég hafði ekki kvittunina var ég vinsamlegast beðinn um að fylgja öryggisverði að afgreiðslunni, þar sem afgreiðslustúlkan baðst afsökunnar á að hafa gleymt að fjarlægja þjófavörnina. Ég hló og sagði ekkert mál, um leið og ég þurrkaði svitastrauminn af enninu.

Þegar út í bíl var komið brotnaði ég svo saman og fór heim að borða súkkulaði. Óvenju góður sunnudagur.

Monitor viðtal

Ég bý einn og tala oft við sjálfan mig, þó ég sé frekar leiðinlegur. Af hverju ætti ég þá ekki að mega viðtala sjálfan mig?

Í Monitor blaði Morgunblaðsins er iðulega viðtal við einhvern í miðju blaðsins. En aldrei við mig. Ég ætla samt að svara þessum spurningum.

Finnur Torfi á 30 sekúndum

Fyrstu sex
280778

Það sem fékk mig helst til að nenna fram úr rúminu í morgun
Ég þurfti að mæta á fund kl 9:00. Og ég þurfti að pissa.

Það sem veldur mér helst hugarangri þessa stundina
Ég þarf að pissa.

Það fyndnasta sem ég hef séð á netinu
Það er síbreytilegt. Líklega eitthvað sem ég hef heyrt. Þá sennilega smásagan IBrain eftir Brett Gelman.

Æskuátrúnaðargoðið
Skeletor.

KVIKMYNDIR

Myndin sem ég get horft á aftur og aftur
Seven, Memento, Matrix og Contact.

Myndin sem ég væli yfir
Ég get ekki grátið. Ekki opinberlega amk.

Myndin sem ég grenja úr hlátri yfir
Ég hef einu sinni hlegið allan tímann yfir mynd og það var fyrsta myndin af Austin Powers fyrir ca 15 árum síðan.

Uppáhaldsmyndin mín í æsku
The Never Ending Story, þó ég hafi bara séð hana einu sinni og skildi varla neitt í henni.

Versta mynd sem ég hef séð
Greenberg. Því minna sem ég segi um þann viðbjóð, því betra.

TÓNLIST

Lagið í uppáhaldi þessa stundina
Silent Shout með The Knife og Miss it so much með Röyksopp.

Lagið sem kemur mér alltaf í gott skap
Det snurrar i min skalle með Familjen. Sérstaklega myndbandið.

Lagið sem ég fíla í laumi
Þau eru mörg. M.a. Lights með Ellie Goulding.

Lagið sem ég syng í karókí
Ég myndi frekar éta á mér andlitið en að syngja fyrir framan aðra. En ef ég væri ekki félagslega vanskapaður þá myndi ég líklega velja Get off með Dandy Warhols.

Nostalgíulagið
Veridis Quo með Daft Punk.

ANNAÐ

Uppáhaldsmatur
Soðin ýsa með rúgbrauði og feiti.

Maturinn sem ég fæ mér þegar ég ætla að taka mig á
Cheerios.

Versti matur sem ég hef smakkað
Íslenskur þorramatur. Og rækjur.

Líkamsræktin mín
Ræktin 4-5 sinnum í viku. Karfa 1-2 sinnum í viku. Ofbeldisfullt sjálfshatur 7 sinnum í viku.

Stoltasta augnablikið á íþróttaferlinum mínum
Skoraði hvorki fleiri né færri en 14 stig tvisvar með Álftanesi og náði hátt í 7-8 fráköstum í leiðinni. Og svo auðvitað annað sæti í bringusundi í mínum riðli á fámennu sundmóti í Bjarnarfirði þegar ég var ca 12 ára.

Ræktarmisskilningur

Hér er áríðandi tilkynning til þeirra sem sáu til mín í ræktinni í kvöld:

Ég er með MP3 spilara sem er bundinn í reimina á stuttbuxunum mínum, þar sem ég hef engan annan stað til að geyma hann á. Spilarinn er svo tengdur við heyrnartól sem fara undir hlaupapeysu sem ég er yfirleitt í og í eyrun á mér. Þetta veldur því að spilarinn hangir fyrir ofan klofið á mér alla jafna, innan á stuttbuxunum mínum.

Í kvöld þegar heyrnartólin duttu úr sambandi við spilarann í miðri teygjuæfingu, akkúrat þegar nokkrar hressar ungar stelpur komu að teygja við hliðina á mér, var ég að reyna að tengja spilarann við heyrnartólin blint í gegnum stuttbuxurnar með báðum höndum á meðan ég starði blint út í loftið.

Það var ekki fyrr en ég tók eftir að stelpurnar voru í þessu lofti sem ég var að horfa á, og að þær voru fullar af viðbjóði, að ég áttaði mig á hversu óviðeigandi þessi aðgerð var.

Ég vil því koma því áleiðis að ég er ekki viðbjóður. Eða amk ekki svona mikill viðbjóður.