Hvað er að frétta, Finnur?

Marta María hunsaði mig þessa vikuna þegar hún tók einhvern Teit framyfir mig í liðnum "Hvað er að frétta, [nafn]?" liðnum á síðu sinni (sjá hér).

Ég læt ekki vaða svona yfir mig og svara spurningunum hérna, fullum hálsi!

Halló, hvað er að frétta?
Ég er veikur!

Hvar áttu heima?
Í Furugrund í Kópavogi.

Hvað ertu búinn að vera að gera í vikunni?
Fyrir utan að liggja veikur og vorkenna sjálfum mér? Ekkert.

Hvað ætlarðu að gera á morgun?
Ég hugsa að vinni eitthvað, með tárin í augunum, passi Valeríu Dökk frænku mína og leggist svo fyrir. Kannski ég vorkenni sjálfum mér ef ég er í stuði.

Eigum við að skila einhverju til vina og vandamanna?
Já þú mátt biðja Sibba um að hringja í mig við tækifæri. Takk.

ps.?
Ef ég gæti fengið virðisaukaskattinn af pappírnum sem notaður hefur verið í snýtingar síðustu daga endurgreiddan þá væri ég moldríkur maður.

Hlaðvörpin mín

Einhversstaðar í fyrndinni fannst mér einhver hrópa spurninguna "Á hvaða hlaðvörp (ens. podcasts) hlustarðu að staðaldri?". Þrátt fyrir að yfirgnæfandi líkur séu á því að þetta séu bara raddirnar í hausnum á mér, þá finnst mér rétt að svara opinberlega.

1. Comedy Bang Bang
Grínistinn Scott Aukerman tekur á móti gestum sem allir eiga það sameiginlegt að vera fyndnir eða tónlistarmenn. Yfirleitt bæði. Í nánast hverjum þætti mæta svo karakterar sem hafa fengið mig til að frussa úr hlátri í vinnunni.

Dæmi: IBrain smásagan eftir Brett Gelman. Sennilega eitthvað það fyndnasta sem ég hef heyrt.

2. Grandma's Virginity
Ryan Ridley, Justin Roiland og Jackie Buscarino tala öskrast á um það sem er að gerast í lífi þeirra hverju sinni. Stundum mæta nokkuð þekktir gestir í öskurviðtöl. Í lokin eru lesin e-mail frá hlustendum.

Justin Roiland er einn fyndnasti maður í heimi, eins og heyrist í þessum hljóðbúti, sem er svar hans við gagnrýni hlustanda sem heitir Kevin James.

3. Radiolab
Jad Abumrad og Robert Krulwich fjalla um áhugaverð mál á frumlegan hátt, segja sögur og taka viðtöl. Full mikið klippt efni á köflum og aðeins of mikill hressleiki en það sleppur. Margt af efninu er óendanlega áhugavert.

4. Freakonomics
Stephen Dubner tekur fyrir allskonar frávikshagfræði og skoðar í bak og fyrir. Mjög skemmtilegt en gefið út of sjaldan.

5. NBA Ísland
Baldur Beck tekur gesti í viðtal um körfuboltadeildir (aðallega þá Íslensku og Bandarísku). Eina Íslenska hlaðvarpið sem ég hlusta á. Mjög vel að því staðið og dúndrar í áhugamálspunginn á mér. Mæli sterklega með þessu!

Hugljómun

Ég hef átt Peugeot 206 bifreið mína núna í sex ár. Á þeim tíma hefur hún bilað óteljandi oft og kostað mig óteljandari meiri peninga.

Ég hef oft hugsað hvort ég hefði kannski átt að sjá þetta fyrir, þegar ég keypti bílinn. Í dag sá ég það sem ég hefði átt að sjá á kaupdeginum:

Þetta er mynd af Peugeot 206 með nákvæmlega eins innréttingu og minn.

Aldrei, undir nokkrum kringumstæðum, kaupa bíl sem byggir allt mælaborðið í kringum neyðarhnappinn, sem fær sérstakt heiðurssæti á vel aðgengilegum stað í miðjunni.

Minn neyðarhnappur er eins, nema hann er með djúp för eftir lófana á mér.

Skegggraf

Í dag er vika síðan ég rakaði á mér andlitið síðast (skeggið nánar tiltekið (ekki augabrúnirnar)).

Þá lít ég á grafið mitt og sé að ég er kominn yfir mörkin að vera ruglað saman við róna og að mér líður hræðilega með útlit mitt.

Það verður spennandi að vita hvort ég komist út úr rónamörkunum áður en ég raka mig eða hvort ég gangi alla leið og safni alskeggi í fyrsta sinn. Til þess þarf ég að safna í amk mánuð og geng blint í sjóinn með útlitslega líðan mína þar sem grafið sýnir aðeins fyrstu 14 daga eftir rakstur. Tilraunir hafa ekki verið framkvæmdar með lengra tímabil, ennþá.

Kvikmyndarýni

Hér er listi yfir þær myndir sem eru í bíóhúsum höfuðborgarsvæðisins og ég hef séð, ásamt þriggja orða umsögn um þær.

1. Looper (Ísl.: Lykkjari)
Gerð: Vísindaskáldsögu/spennumynd.
Um: Náungi er leigumorðingi fyrir framtíðarglæpamenn.
Umsögn: Besta mynd ársins?
Stjörnur: 3,5 / 4.

2. Lawless (Ísl.: Laglaus)
Gerð: Köntrí/spennu/dramamynd.
Um: Þrír bræður selja áfengi á bannárunum í Bandaríkjunum.
Umsögn: Blóð útum allt.
Stjörnur: 2 / 4.

3. The Campaign (Ísl.: Sprelligosar sprellast)
Gerð: Gaman/ádeilumynd.
Um: Tveir skrautlegir náungar keppast um sæti á alþingi Bandaríkjanna.
Umsögn: Nokkuð fyndin, en...
Stjörnur: 2 / 4.

4. The Bourne Legacy (Ísl.: Arfleiðin hans Bjarna)
Gerð: Vísindaskáldsögu/spennumynd.
Um: Vondir kallar reyna að drepa líkamlega yfirburðamann, sem þeir gerðu. Fjórða Bourne myndin.
Umsögn: Fyrri myndir + væmni.
Stjörnur: 3 / 4.

5. The Expendables 2 (Ísl.: Hinir missanlegu 2)
Gerð: Gaman/spennumynd.
Um: Ofurhetjusveit með byssur ráðast inn í lönd og drepa.
Umsögn: Súrrealískt ofbeldi + grín.
Stjörnur: 1,5 / 4.

6. The Watch (Ísl.: Úrið)
Gerð: Vísindaskáldsögu/gamanmynd.
Um: Miðaldra maður stofnar nágrannavörsluklúbb og lendir í skrautlegum ævintýrum.
Umsögn: Vince Vaugn = bíómyndarústari.
Stjörnur: 1 / 4.

Fuglasöngur

Í nótt lá ég andvaka heima, aldrei þessu vant, þegar ég heyrði tíst í fugli fyrir utan gluggann hjá mér. Hann raulaði stutt lag reglulega og virtist vera að brotna saman úr einmannaleika.

Í framhaldinu fór ég að hugsa um hversu stórkostlegt það er að geta hlustað á gullfallegan smáfuglasöng, eins og þennan, nánast hvenær sem er, en gefa sér aldrei tíma til þess. Nú hafði ég tíma og ég ætlaði að njóta þess.

Þá áttaði ég mig á því að þetta var ekki fuglasöngur heldur blýstur úr nefinu á mér. Ég sofnaði tveimum tímum síðar.

Einkennileg kauphegðun

Í stað þess að versla inn mat í Bónus síðasta laugardag, eins og ég geri alla laugardaga, ákvað ég að kaupa bara 12 litlar dósir af vanillu kók.

Ég veit ekki af hverju eða hvað ég hélt að ég myndi borða alla vikuna, en þegar fjórir dagar eru liðnir af vikunni hef ég bara drukkið tvær dósir sem er merki um ótrúlegan sjálfsaga. Samkvæmt mínum útreikningum er það viljastyrkur upp á hestöfl meðalstórs Hummer jeppa.

Allavega, í stað þess að versla inn mat fyrir 5.000 krónur í Bónus hef ég eytt um 10.000 krónum í stakar máltíðir um allan bæ í þessari viku. Ekki snjallasta hugmynd sem ég hef fengið. En samt. Bara tvær kókdósir á fjórum dögum. Kallið mig bara andlegan Superman.

Heimsókn að norðan

Kolla systir, Árni Már maður hennar og dóttir þeirra, Anna María komu við í Kópavogi áður en þau flugu út í buskann (til Glasgow nánar tiltekið). Ég mætti með ótrúlega ódýra símann minn og tók myndir:

Anna María, Kolla og Valería Dögg, dóttir Björgvins bróðir og Svetlönu.

Valería Dögg grandskoðar óléttubumbuna á Kollu.

Anna María og Valería Dögg ræða um hvaða áhrif það gæti haft á stjórnarsamstarfið að hækka hátekjuskattinn eða eitthvað. Ég var ekki að hlusta.

Árni Már, Björgvin og Svetlana elghress.

Kolla og Anna María borða melónu.

Þessi er reyndar tekin á afmælisdegi Valeríu Daggar, þann 19. september síðastliðinn. Hún vildi hjálpa mér að taka mynd. Á myndinni er hún með afmæliskórónuna sem hún fékk á leikskólanum og körfuboltann sem ég gaf henni.

Annars er allt fínt að frétta. Ekki hringja þó ég hafi ekki bloggað í nokkra daga.

2ja ára afmæli

Í dag átti Valería Dögg, bróðurdóttir mín 2ja ára afmæli. Hún nýtti tækifærið og stjórnaði foreldrum sínum eins og tuskudúkkum:

Ég gaf henni auðvitað litla körfu og körfubolta í afmælisgjöf, sem hún æfði sig á um kvöldið. Í næstu viku ætla ég að kenna henni að drippla körfubolta. Fyrsti leikur tímabilsins er svo í næsta mánuði.

Föstudagssjálfsvitalið

Í dag rakst ég á viðtal í blaðinu Lífið sem fylgir Fréttablaðinu á föstudögum. Þetta viðtal hefur aldrei verið tekið við mig, merkilegt nokk, svo ég tek það sjálfur og birti hér:

Ný markmið sett fyrir veturinn.
Á haustin er gott að endurskoða markmið sín þegar kemur að heilsu og hreyfingu. Sirrý Arnardóttir og Krstrún Ösp Barkardóttir sögðu Lífinu frá sínum markmiðum Finnur Torfi Gunnarsson sagði engum frá sínum markmiðum.

Hefurðu alltaf stundað reglulega hreyfingu?
Já. Þegar ég var krakkafífl spilaði ég fótbolta daglega. Þegar ég varð unglingur spilaði ég körfubolta eins og ég gat. Eftir að ég komst á fullorðinsaldur hef ég haldið áfram í körfubolta en einnig hafið skokk, leðuriðju og lyftingar.

Hvaða hreyfingu ætlar þú að stunda í vetur?
Körfubolta með Þristinum og Álftanesi, brennsla og lyftingar í ræktinni ásamt dass af útihlaupi ef veður leyfir. Smá séns að ég spili bandí líka. Og svo passa ég vonandi Valeríu Dögg, bróðurdóttir mína, sem oftast. Það er eins og crossfit.

Ertu búin[n] að setja þér einhver ný markmið?
Já, að meiðast ekki og að verða ekki feitur.

Borðar þú reglulega yfir daginn?
Já:
Fyrsta máltíð kl 12:30
Næsta máltíð kl 15:30
Létt snarl klukkan 18:30
Kvöldmatur klukkan 23:30
Nammiát frameftir nóttu.

Ætlarðu að tileinka þér eitthvað nýtt í eldamennskunni á næstunni?
Helst ekki.

Hvaða vítamín tekur þú daglega?
Ekkert utan matar (og nammis).

Samstillt skref (ens. Dubstep) lög

Hér eru nokkur lög sem ég hlusta reglulega á í vinnunni á meðan ég verka tölur í Excel.

Ég virðist ekki geta fengið leið á þeim, svo mér finnst rétt að deila þeim. Aðallega fyrir mig að finna þegar ég verð orðinn gamall og búinn að týna allri tónlistinni minni.

Lögin falla undir tónlistarstefnuna Dubstep.

Skream - Rutten

Mt Eden - Sierra Leone

Skream - Exothermic Reaction

Ævintýri dagsins

Í ræktinni í kvöld mættu nokkrir galvaskir lögreglumenn til að tækla andlega veikan mann sem ráfaði um lyftingasalinn, haldandi ræðu yfir mannskapnum (að mér heyrðist og sýndist, ég var gleraugnalaus). Það verður væntanlega eitthvað um þetta í fréttamiðlum á morgun.

Nú kunnið þið eflaust að velta fyrir ykkur hvernig í ósköpunum ég muni ná að láta þessa bloggfærslu snúast um mig. Það er einfalt.

Fyrir nokkrum vikum voru birtar tölur í fréttum úr könnun sem ég verkaði fyrir 365. Og í kvöld varð ég vitni að einhverju sem kemst líklega í fréttirnar á morgun, eins og áður segir. Það má því með sanni segja að ég sé Forrest Gump Íslands, alltaf allsstaðar þar sem eitthvað merkilegt gerist.